ޒަރީން ޚާން ކެޓްރީނާ ކެއިފްއާ ވައްތަރު ކަމަށް ވަރަށް ގިނަ ބެލުންތެރިން ބުނެއެވެ. މީގެ ތެރޭގައި ބޮލީވުޑްގެ ބައެއް ފަންނާނުންނާއި ޕްރޮޑިއުސަރުންވެސް ހިމެނެއެވެ. މި ކަމުގެ ސަބަބުން އޭނާގެ ކެރިއަރަށްވަނީ ނޭދެވޭ އަސަރުތަކެއް ކޮށްފައެވެ.
އެންމެ ފުރަތަމަ ބެލުންތެރިންނަށް ޒަރީން ފެނިގެން ގޮސްފައިވަނީ 2010 ވަނަ އަހަރު ސަލްމާނު ޚާނާއި އެކުގައި ހިންދީ ފިލްމު "ވީރް" އިންނެވެ. ޒަރީން ޚާންގެ ޑެބިއު ކާމިޔާބު ވިނަމަވެސް އޭނާއަށް މި ދާއިރާގައި ކުރިޔަށް ނުދެވުނީވެސް ކެޓްރީނާއާއި ވައްތަރުވުމުން ކަމަށް އޭނާ ވަނީ ބުނެފައެވެ. އަދި ޒަރީން ބުނެފައިވާ ގޮތުގައި އޭނާ އަކީ ހަމަ އެކަނި "ޕްރިޓީ ފޭސް" އެއް ނޫނެވެ.
"ވީރް" ރިލީސް ވުމާއެކުގައި ގިނަ ހެޑްލައން ތަކުގައި ޒަރީން އާއި ކެޓްރީނާ ވައްތަރު ކަމުގެ ވާހަކަ އާންމުވެގެން ދިޔައެވެ. އޭނާ ފިލްމީ ދާއިރާއަށް ނުކުތުމުގެ ކުރިން މީސްމީޑިއާގައި ހިއްސާކުރާ ފޮޓޯތަކުންވެސް ކެޓްރީނާއާއި ވައްތަރުކަމަށް ބުނާކަމަށް އޭނާ ވަނީ ބުނެފައެވެ.
އިތުރަށް ވާހަކަ ދައްކަމުން ޒަރީން ބުނެފައިވަނީ މިހާރާއި އަޅާކިޔާއިރު އޭރު މީސްމީޑިއާ އެހާ ބާރުގަދަ ނޫނެވެ. އަދި އޭރު ގިނަ މީހުން ބަރޯސާ ވަނީ ބޮޑަށް މީޑިއާ އާއި ނޫސްތަކަށް ކަމުގައި ޒަރީން ވަނީ ބުނެފައެވެ. އެގޮތުން ޒަރީން ގަބޫލުކުރާ ގޮތުގައި ބެލުންތެރިންނަށް އަމިއްލަ ނަޒަރުން އޭނާ ފެނި ދެނެގަންނާނެ ފުރުސަތެއް ދެވިފައި ނުވެއެވެ.
View this post on Instagram
މި މައްސަލައިގެ އިތުރުން ޒަރީން ބުނެފައިވަނީ އޭނާގެ ބަރުދަންވެސް މި ދާއިރާގައި ވަނީ މައްސަލައަކަށްވެފައެވެ. އޭނާ 40 ކިލޯ ބަރުދަން ލުއިވުމުންވެސް މިކަމަކަށް ބަދަލެއް ނާދެއެވެ. އަދި އޭނާއަށް ކުރާ "ފެޓް ޝޭމް" އަށްއެއްވެސް ބަދަލެއް ނާދެއެވެ. އަދި އޭނާ ބުނެފައިވަނީ ބައެއް ފަހަރު މީހުން އޭނާއަށް "ފެޓްރީނާ" އޭވެސް ކިޔައެވެ. އަދި ހަފްލާއަކަށް ދިޔަނަމަވެސް އޭނާއާއި ބެހޭގޮތުން ލިޔެފައި ހުންނަނީ ހަމައެކަނި އޭނާގެ ބަރުދަނުގެ ވާހަކައެވެ.
"ވީރް"ގެ އިތުރުން "ރެޑީ"، "ހައުސްފުލް 2″، "ހޭޓް ސްޓޯރީ 3″ އަދި "1921″ ފަދަ ފިލްމު ތަކުން ޒަރީން ފެނިގެން ގޮސްފައިވެއެވެ.
