މާދަމާ ގެސްޓްހައުސްތައް އަލުން ހުޅުވާއިރު ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫ.އެން.ޑީ.ޕީ.) އިން ހަދިޔާކޮށްފައިވާ ދޮންސަރޖިކަލް! މާސްކް ރާއްޖޭގައި ހިންގާ ގެސްޓްހައުސް ވިޔަފާރިތަކަށް ހަދިޔާކުރުމަށް ހަމެޖެހިފައިވާކަމަށް ޓުވަރިޒަމް މިނިސްޓްރީން ހާމަކޮށްފި އެވެ.
އެމިނިސްޓްރީން ނެރުނު ބަޔާނެއްގައި ވަނީ ގެސްޓްހައުސް ވިޔަފާރިތައް އަލުންފައްޓަން، ސިނާޢަތުގެ ހުރިހާ ފަރާތްތަކުން ތައްޔާރުވަމުންދާކަން ފާހަގަކޮށް، ކޯވިޑް19 ގެ ބަލިމަޑުކަމުން އަރައިގަތުމަށް ރާއްޖެއިން ކުރަމުންދާ މަސައްކަތަށް އެހީތެރިވުމުގެ ގޮތުން ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫ.އެން.ޑީ.ޕީ.) އިން ހަދިޔާކޮށްފައިވާ ނޮން-ސަރޖިކަލް! މާސްކް ރާއްޖޭގައި ހިންގާ ގެސްޓްހައުސް ވިޔަފާރިތަކަށް ހަދިޔާކުރުމަށް ހަމަޖެހިފައިވާކަމަށެވެ.
ކޯވިޑް-19 އާގުޅިގެން ރާއްޖޭގެ މީހުން ދިރިއުޅޭ ރަށްރަށުގައި ހިންގާ ގެސްޓްހައުސްތައް ވަގުތީގޮތުން ހިންގުން ހުއްޓާލެވިފައި އޮތުމަށްފަހު މާދަމާ ގެސްޓްހައުސްތައް ހުޅުވުމަށް ސަރުކާރުންވަނީ ނިންމާފައެވެ. އެގޮތުން ހެލްތު ޕްރޮޓެކްޝަން އޭޖެންސީ (HPA) އިން ގެސްޓްހައުސްތައް އަމަލުކުރަންޖެހޭ އުޞޫލެއްވަނީ ކަނޑައަޅާފައެވެ. މިއުޞޫލުތަކާ އެއްގޮތަށް ރާއްޖޭގެ ބައެއް ގެސްޓްހައުސްތައް މިހާރުވަނީ ހުޅުވުމަށް ތައްޔާރުވެފައެވެ.
ރައްޔިތުންގެ ސަލާމަތާ ރައްކާތެރިކަމަށް ސަރުކާރުންދޭ މުހިންމުކަން ފާހަގަކޮށް ސިންގަޕޫރުގެ ޓެމަސެކް ފައުންޑޭޝަންއިން ހަދިޔާކޮށްފައިވާ "ރީޔޫސަބަލް' މާސްކް ގެސްޓްހައުސް ވިޔަފާރިކުރާ ރަށްރަށުގެ ރައްޔިތުންނަށް ހަދިޔާކުރުމަށްވަނީ ހަމަޖެހިފައެވެ. މި މާސްކްތައް ގެސްޓްހައުސްތަކާއި ރަށްރަށުގެ ރައްޔިތުންނަށް ކައުންސިލް މެދުވެރިކޮށް ބެހުމަށްޓަކައި ލޯކަލް ގޮވަރމަންޓް އޮތޯރިޓީ (އެލް.ޖީ.އޭ.) އާއި ހަވާލުކުރުމަށްވަނީ ހަމަޖެހިފައެވެ.
ޓުވަރިޒަމް މިނިސްޓްރީން ވަނީ ރާއްޖޭގެ ފަތުރުވެރިކަމުގެ ޞިނާޢަތުގައި މަސައްކަތް ކުރައްވާ އެންމެހައި މުވައްޒަފުންނާއި މެނޭޖްމަންޓުތަކުން، މިވޭތުވެދިޔަ ދުވަސްތަކުގައި، HPA އިން އަދި ކަމާގުޅޭ ސަރުކާރުގެ އިދާރާތަކުން ދެއްވާ އިރުޝާދުތަކަށާއި އެންގުންތަކަށް ކިޔަމަންތެރިކަމާއެކު ބޯލަނބައި، ކެތްތެރިކަމާއެކު ދެއްވި އެއްބާރުލެއްވުމާއި އެހީތެރިކަމަށް ޝުކުރު އަދާކުރައްވާފަ އެވެ.
ކޮމެންޓު ފޮނުވާ