29 ލައްކަ އިންޑިއާ ރުޕީސްގެ ފްރޯޑު މައްސަލައަކާއި ގުޅިގެން ކެރެލާގެ ސިފައިން ފިލްމީ ތަރި އަދި މޮޑެލް ސަނީ ލެއޯނާ ހުކުރު ދުވަހު ވަނީ ސުވާލުކޮށްފަ އެވެ. މީގެ އިތުރުން މި މައްސަލައާ ގުޅިގެން ކެރެލާ ހައިކޯޓަށް ސަނީ ވެއްދި މައްސަލާގައި އެކޯޓުން ވަނީ ކުރިއާލައި އެންގުމަކާއި ނުލާ މި މައްސަލާގައި ސަނީ ހައްޔަރު ނުކުރުމަށް އަމުރެއް ނެރެފައެވެ. އެހެން ނަމަވެސް މި މައްސަލައިގެ ތަހުގީގު ކުރިއަށް ގެންދިއުމަށް އެ ސްޓޭޓްގެ ކްރައިމް ބްރާންޗަށް ކޯޓުން ވަނީ އަންގާފައެވެ.
ސަނީ ލެއޯން މިވަގުތު ހުރީ ރިއަލިޓީ ޓީވީ ޝޯވ "ސްޕްލިޓްސްވިލާ"ގެ ޝޫޓިންގައި ކެރެލާގައެވެ.
Go time!! Work work work pic.twitter.com/YvK98KlPTx
— sunnyleone (@SunnyLeone) December 14, 2020
ސަނީ 29 ލައްކަ ރުޕީސްއަށް ހިޔާނާތްތެރި ވެފައި ވާކަމުގެ މައްސަލަ ފުލުހުންނަށް ހުށައަޅާފައި ވަނީ އިވެންޓު މެނޭޖަރެއް ކަމުގައިވާ އާރް ޝިޔާސް އެވެ. އޭނާ ބުނެފައިވަނީ، ހަފްލާތަކެއްގައި ބައިވެރިވުމަށް ސަނީ މިފައިސާ ނަގާފައި ވާކަމަށެެވެ. އެހެންނަމަވެސް މި ހަފްލާތަކަށް އޭނާ ހާޒިރުވެފައި ނުވާކަމަށް ސަނީއާ ދެކޮޅަށް ހުށަހަޅާފައިވާ މައްސަލާގައި ބުނެފައިވެއެވެ.
އިވެންޓު މެނޭޖަރުގެ މި އިލްޒާމަށް ސަނީ ލިއޯނީ ބުނެފައިވަނީ އޭނާ ބައިވެރިވާން ފައިސާ ނަގާފައިވާ އިވެންޓް 5 ފަހަރެއްގެ މަތިން މިހާތަނަށް ތާރީހު ބަދަލުކޮށްފައި ވާކަމަށެވެ. އެހެންކަމުން އިވެންޓްގައި ބައިވެރި ނުވެވުން އެއީ އޭނާގެ މައްސަލައެއް ނޫންކަމަށާއި މިހާރުވެސް ކުރިއާލައި ތާރީހު އަންގައިފިނަމަ އިވެެންޓްތަކުގައި ބައިވެރިވުމަށް އޭނާ ތައްޔާރަށް ހުރިކަަމަށް ސަނީ ވަނީ ބުނެފައެވެ. އަދި އޮޅުވާލާ މަކަރުހެދުމާއި ހިޔާނާތްތެރިވުމުގެ އެއްވެސް މަގްސަދެއް އޭނާގެ ނެތްކަމަށްވެސް ވަނީ ބުނެފައެވެ.
ޝިޔާސްގެ މި މައްސަލާގައި ބުނެފައވާގޮތުން 2016 ވަނަ އަހަރުން ފެށިގެން ސަނީ ލިއޯނީގެ މެނޭޖަރުވަނީ އޭނާގެ އަތުން އިންސްޓޯލްމަންޓަށް މިފައިސާ ނަގާފައެވެ. އަދި މިހާތަނަށް ފަސް ވަރަކަށް ހަފްލާގައި ބައިވެރިވާނެ ކަމަށް ބުނެ ސަނީ ހާޒިރުނުވެ ވާކަމަށްވެސް ޝިޔާސް ހުށަހެޅި މައްސަލާގައި ބުނެފައިވެއެވެ.
ސަނީ ލެއޯން އެންމެ ފަހުން ފެނިފައިވަނީ އެމް އެސް ޕްލޭޔާގެ ވެބް ސީރީސްއެއް ކަމަށްވާ "ބުލެޓްސް" އިންނެވެ.
