"ޝަކްތީ އަސްތިވާ އެކް އެހްސާސް" ގެ ތަރި ރޫބިނާ ދިލައިކް ވަނީ ބިގްބޮސް 14 އިން އޭނާގެ ވަރުގަދަ ޝަހްސިއްޔަތާއި އެކު ފަލަ ސުރުހީއަށް އެތަށް ފަހަރެއްގެ މަތިން އަރާފަ އެވެ.
ބިގްބޮސްގެ ގޭގައި ހަތަރު މަހަށް ވުރެ ގިނަ ދުވަސް ކާމިޔާބު ކަމާއި އެކު ހޭދަކޮށްފައިވާ ރޫބިނާ ވަނީ ވަރުގަދަ ޝަހްސިއްޔަތެއްގެ ގޮތުގައި ބެލުންތެރިންނަށް ފެނިގެން ގޮސްފަ އެވެ. އަދި ހަމަ އެހެންމެ މި ޕްރޮގްރާމުގައި އޭނާ ބައިވެރިވެފައިވަނީ މޮޅުވުމުގެ ވަރުގަދަ އަޒުމުގައި ކަންވެސް މިކަމުން އެނގިގެންދެ އެވެ.
ބިގްބޮސްގެ ތެރެއިން އޭނާ ފާހަގަވަނީ އޭނާގެ ރުޅިގަދަ މިޒާޖެވެ. އަދި މި ފަހުން ޝޯވގެ ބައެއް ބައިވެރިންނާ ރުބިނާ އާމެދު ވަރުގަދަ ކުރިމަތިލުން ތަކެއްވެސް ހިނގާފައި ވެއެވެ. އެގޮތުން ރާކީ އާއި ރުބިނާ އާ ދެމެދު އުފައްދާފައި ވާ ކަންތައްގަނޑަކީ ޝޯވއަށް މީހުންގެ ޝައުޤުވެރިކަން ހޯދަން އުފައްދާފައިވާ ހާދިސާތަކެެއް ކަމަށް ގިނަބަޔަކު ގަބޫލުކުރެއެވެ.
ރުބިނާ އާއި އޭނަގެ އާއިލާގެ މެމްބަރުން ބުނާގޮތުގައި އޭނާ އެހާހިސާބަށް އައިސްފައި ވަނީ ދިރިއުޅުމުގައި ގިނަ ގުނަ ކަންތައްތަކެއް ތަހަންމަލް ކޮށްފައެވެ. އެގޮތުން ދިރިއުޅުމުގެ ވަކި ހިސާބަކުން އަމިއްލައަށް މަރުވުމުގެ ހިޔާލުތައްވެސް ގެންގުޅުނު ކަމަށް ރުބިނާ ދާދި ފަހުން ވަނީ ބުނެފައެވެ.
26 އޯގަސްޓު 1987 ގައި ޝިމްލާގެ ހިމާޗަލް ޕްރަދޭޝްއަށް އުފަން ރޫބިނާ އޭނާގެ ކެރިއަރު ފަށައިފައިވަނީ ރީތިކަމަށް ވާދަކުރަމުންނެވެ. އަދި މޮޑެލް ކުރުމުންނެވެ. މިއަށްފަހު 2008 ވަނަ އަހަރު މުނިފޫހިފިލުވުމުގެ ދާއިރާއިން ފުރަތަމަ ފަހަރަށް ރޫބިނާ ފެނިގެން ދިޔައީ ޒީޓީވީ އިން ދެއްކި ޗޯޓީ ބަހޫއިންނެވެ.
View this post on Instagram
މީގެ ފަހުން އިންޑިއާގެ މަޝްހޫރު އެތަކެއް ޓީވީ ޝޯތަކުގެ ބަތަލާގެ ރޯލުން ރޫބިނާ ވަނީ ފެނިގެން ގޮސްފައެވެ. ޗޯޓީ ބަހޫގައި ރޫބީނާ އާއި އެއްކޮށް މަސައްކަތް ކުރި އަވީނާޝް ސަޗްދޭވް އާއި ރުޅިވުމަށް ފަހު 21 ޖޫން 2018 ގައި ރޫބިނާ ވަނީ އަބީނަވް ޝުކްލާއާއި ކައިވެނިކޮށްފަ އެވެ.
މި ދެމީހުން ކައިވެނި ކޮށްފައިވަނީ ތިން އަހަރު އެއްކޮށް ހޭދަ ކުރުމަށްފަހުގައެވެ. މިހާރު ރޫބިނާ އާއި އަބީނަވްވެސް ދަނީ ބިގް ބޮސް އަހުސްގައި ބައިވެރިންގެ ގޮތުގައި މަސައްކަތް ކުރަމުންނެވެ.
ރޫބިނާ ވަނީ ގާތްގަނޑަކަށް 10 އަހަރު ޓީވީ އިންޑަސްޓްރީގައި މުނިފޫހިފިލުވައި ދިނުމުގައި މަސައްކަތްކޮށްފަ އެވެ.
