ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔަޢުޤޫބު ޢަބްދުﷲ މެންބަރުކަން ގެއްލި އެދާއިރާގެ ގޮނޑި ހުސްވެފައިވާކަމަށް ކަނޑައަޅައިދިނުމަށް ސުޕްރީމް ކޯޓަށް ހުށައެޅި މައްސަލައިގެ އަޑުއެހުން އަންނަ ހަފްތާއަށް ފަސްކޮށްފިއެވެ. އަންނަ ބުރާސްފަތި ދުވަހަށް ކުރިން ތަޢާވަލުކުރި މިމައްސަލައިގެ އަޑުއެހުން ފަސްކޮށްފައިވަނީ ޔައުޤޫބުގެ އެދިވަޑައިގަތުމަށްކަމަށް މަޢުލޫމާތުލިބެއެވެ.
ދިވެހިރާއްޖޭގެ ޗާޓަޑް އެކައުންޓެންޓުންގެ ގާނޫނުގެ ދަށުން އުފެދިގެންދިޔަ މޯލްޑިވްސް އިންސްޓިޓިއުޓް އޮފް ޗާޓަޑް އެކައުންޓެންޓް ކައުންސިލްގެ މެމްބަރަކަށް ޔަޢުޤޫބު އަައްޔަންކޮށް މަޤާމުގެ ހުވާކުރެއްވުމުން އޭނާގެ މެންބަރުކަމާމެދު ވަނީ ސުވާލު އުފެދިފައެވެ. އެހެންކަމުން އޭނާގެ މެންބަރުކަން ގެއްލިއްޖެކަމަށާއި، އެދާއިރާގެ ގޮނޑި ހުސްވެފައިވާކަމަށް ކަނޑައަޅައިދިނުމަށް ހުށައެޅީ ސިވިލް ކޯޓުގެ ކުރީގެ ޤާޒީ މުޙައްމަދު ޙަލީމްއެވެ. އޭނާ ހުށައެޅުއްވި މައްސަލާގައި ވަނީ ޗާޓަޑް އިސްޓިޓިއުޓްގެ މެމްބަރުކަމާ ޔައުގޫބް ހަވާލުވެވަޑައިގަތް ވަގުތުން ފެށިގެން ދާންދޫ ދާއިރާގެ މެމްބަރު ކަމުގެ ގޮނޑި ހުސްވެފައިވާ ކަމަށް ކަނޑައަޅާއިދިނުމަށެވެ.
ޤާނޫނު އަސާސީގައި ބަޔާންކޮށްފައިވާގޮތުގައި ރައްޔިތުންގެ މަޖިލީހުގެ މެންބަރަކު މަގާމުގައި ހުންނަވައިގެން މުސްތަގިއްލު ކޮމިޝަނެއްގެ މެންބަރުކަން ނުވަތަ މުސްތަގިއްލު މަގާމެއް އަދާ ނުކުރެވޭނެއެވެ. އަދި ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން އަދާކުރަން ޖެހޭ ވަޒީފާއެއް ފިޔަވައި ދައުލަތުގެ އެހެން އެއްވެސް ވަޒީފާއެއް އަދައެއް ނުކުރެވޭނެ ކަމަށްވެސް ބަޔާންކޮށްފައިވެއެވެ.
ދިވެހިރާއްޖޭގެ ޗާޓަޑް އެކައުންޓެންޓުންގެ ގާނޫނުގެ ދަށުން އުފައްދާފައިވާ އިންސްޓިޓިއުޓް އޮފް ޗާޓަޑް އެކައުންޓެންޓްސް އޮފް ދަ މޯލްޑިވްސްއަކީ މިނިވަން މުސްތަގިއްލު ޝަހުޝެއް ކަމަށް އެޤާނޫނުގައި ބަޔާންކޮށްފައިވެއެވެ. އެހެންކަމުން ޔަޤުޤޫބުގެ މެންބަރުކަން ގެއްލިފައިވާކަމަށް ޤާނޫނީ ދާއިރާގެ ވަރަށް ގިނަ ވަކީލުން ގެންދަވަނީ ވިދާޅުވަމުންނެވެ.
ކޮމެންޓު ފޮނުވާ