ސަރުކާރާ ގުޅުނީ ދީނާއި ސިޔާދަތު ދިފާޢުކުރުމަށް: ޝިފާން

ސަރުކާރާ ގުޅުނީ ދީނާއި ސިޔާދަތު ދިފާޢުކުރުމަށް: ޝިފާން

Author
އަހުމަދު
16 ނޮވެމްބަރ 2026 07:40
0

 

ރައީސް ޑރ. މުޙައްމަދު މުޢިއްޒުގެ ސަރުކާރާ ގުޅުނީ ދީނާއި ޤައުމުގެ ސިޔާދަތު ދިފާޢުކުރުމަށާއި އިޤްތިޞާދު ރަނގަޅުކުރުމަށް ސަރުކާރުން ކުރާ މަސައްކަތްތަކަށް އެއްބާރުލުން ދިނުމަށް ކަމަށް އަދާލަތު ޕާޓީން ބުނެފިއެވެ.

ޕީއެންސީއާއި އަދާލަތު ޕާޓީ ކޯލިޝަން އެއްބަސްވުމެއްގައި ސޮއިކުރި ރަސްމިއްޔާތުގައި ވާހަކަފުޅު ދައްކަވަމުން އަދާލަތު ޕާޓީގެ ރައީސް ޝެއިޚް މުޙައްމަދު ޝިފާން ވިދާޅުވީ، 2028 ވަނަ އަހަރުގެ ރިޔާސީ އިންތިޚާބުގައި ޕީއެންސީއާއެކު ހުރުމަށް ނިންމީ ޕާޓީގެ ޢިލްމުވެރިންނާއި މަޝްވަރާ މަޖިލީހާއި އަތޮޅުތަކުގެ މެންބަރުންނާއެކު ކުރި ފުޅާ މަޝްވަރާތަކަށްފަހު ކަމަށެވެ.

ޝިފާން ވިދާޅުވީ، އިސްލާމިކް ފައިނޭންސާއި ޒަކާތު ފަންޑު ފުޅާކުރުމަށާއި ތަޢުލީމީ ދާއިރާއަށް ސަރުކާރުން ގެންނަ ބަދަލުތަކަށް ޕާޓީން ތާއީދުކުރާ ކަމަށެވެ. ދިވެހިރާއްޖޭގެ ބިމާއި ކަނޑުން އިންޗިއެއްގެ މިންވަރުވެސް ބޭރުގެ ފަރާތަކަށް މިލްކު ނުކުރެވޭނެކަމުގެ ޔަޤީންކަން ރައީސް މުޢިއްޒު ދެއްވާފައިވާ ކަމަށްވެސް އޭނާ ވިދާޅުވިއެވެ.

ދައުލަތުގެ ދަރަނި ދެއްކުމަށާއި ޒުވާނުންނަށް ވަޒީފާ ފަހިކޮށްދިނުމަށް ސަރުކާރުން ކުރާ މަސައްކަތްތަކަށް ޕާޓީން ފުރިހަމަ އެއްބާރުލުން ދޭނެ ކަމަށް ޝިފާން ވިދާޅުވިއެވެ. ބޯހިޔާވަހިކަމާއި ދިވެހި ވިޔަފާރިތަކަށް އެހީތެރިވުމަށް ކުރާ މަސައްކަތްތަކަށްވެސް ޕާޓީގެ އެއްބާރުލުން ލިބޭނެ ކަމަށް އޭނާ ވިދާޅުވިއެވެ. ކުރިއަށް އޮތް ރިޔާސީ އިންތިޚާބުގައި ތަނަވަސް އަޣުލަބިއްޔަތަކުން ރައީސް މުޢިއްޒު ކާމިޔާބުކުރުމަށް މަސައްކަތް ފަށަނީ ކަމަށްވެސް ޝިފާން ވިދާޅުވިއެވެ.

ކޮމެންޓު ފޮނުވާ

ކޮމެންޓު

އެތިކަމަކު ކޮމެންޓު ނެތެވެ.