ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ރާއްޖޭގެ ތިން ރަށެއްގައި ފެށުމަށް ތައްޔާރުވަމުންދާ އުމްރާނީ ތަރައްޤީގެ މަޝްރޫޢުތަކަށް ގިނަ އަދަދެއްގެ މުވައްޒަފުން ހޯދަން އިއުލާނުކޮށްފިއެވެ.
އެ ކުންފުނިން ވަޒީފާގެ ފުރުޞަތުތައް ހުޅުވާލާފައިވަނީ ކ. ތުލުސްދޫ، ހއ. މާރަންދޫ އަދި ލ. މާމެންދޫގައި ގާއިމްކޮށްފައިވާ ސައިޓުތަކަށެވެ. މީގެ ތެރެއިން ތުލުސްދޫ ސައިޓަށް އެކަނިވެސް 17 ދާއިރާއަކުން މީހުން ބޭނުންވާކަމަށް އާރްޑީސީން ވަނީ ބުނެފައެވެ. ވަޒީފާއަށް ކުރިމަތިލުމަށް ހުޅުވާލެވިފައިވާ މަގާމުތަކުގެ ތެރޭގައި ސައިޓް މެނޭޖަރުންނާއި، އެސިސްޓަންޓް ސައިޓް މެނޭޖަރުންނާއި، ސުޕަވައިޒަރުންގެ އިތުރުން މެނޭޖްމަންޓް ލެވެލްގެ މަގާމުތަކާއި ސައިޓުގައި އަމަލީގޮތުން މަސައްކަތްކުރާނެ މީހުން ހިމެނެއެވެ.
އަތޮޅުތެރޭގެ ތަރައްޤީއަށް އާރްޑީސީން ގިނަ މަސައްކަތްތަކެއް ކުރަމުން އަންނައިރު، ކުރިއަށް އޮތް ތަނުގައިވެސް އިތުރު ގިނަ ރަށްތަކެއްގައި އުމްރާނީ މަސައްކަތްތައް ފެށުމަށް އެ ކުންފުނިން ދަނީ ތައްޔާރުވަމުންނެވެ. އޭގެ ތެރޭގައި ރަށްރަށުގެ މަގުތައް ޒަމާނީ ފެންވަރަށް ތަރައްޤީކުރުމާއި، ކުޅިވަރު ކުޅޭ ދަނޑުތައް ހެދުން ފަދަ މުހިންމު ގިނަ މަޝްރޫޢުތަކެއް ހިމެނޭކަން ފާހަގަކޮށްލެވެއެވެ. ރަށްރަށުގައި ހިންގާ މިފަދަ މަޝްރޫޢުތަކުގެ ސަބަބުން އެ ރަށްރަށުގެ ރައްޔިތުންނަށް ވަޒީފާގެ ގިނަ ފުރުޞަތުތަކެއް ފަހިވެގެންދާނެއެވެ.
ކޮމެންޓު ފޮނުވާ