އެސްޓީއޯއިން ވިއްކާ ކެރެޓުގެ އަގު ވަރަށް ބޮޑަށް ހެޔޮކޮށް، ކިލޯއެއް އެންމެ 10 ރުފިޔާއަށް ވިއްކަން ފަށައިފިއެވެ. މިއާއެކު އާންމުކޮށް ބޭނުންކުރާ ގިނަ ތަރުކާރީ އާއި މޭވާގެ އަގުތައް ވެސް ވަނީ ދަށްކޮށްފައެވެ.
ކުރިން ކެރެޓު ކިލޯއެއް 37 ރުފިޔާއަށް ވިއްކަމުންދިޔައިރު، މިއީ އާންމުންނަށް ލިބިގެންދިޔަ ވަރަށް ބޮޑު ލުޔެކެވެ. ކެރެޓުގެ އިތުރުން ފިޔާ ކިލޯއެއް 12 ރުފިޔާއިން 10 ރުފިޔާއަށް އަދި އަލުވި ކިލޯއެއް 14 ރުފިޔާއިން 12 ރުފިޔާއަށް ވަނީ ތިރިކޮށްފައެވެ. ހަމައެހެންމެ 75 ރުފިޔާއަށް ހުރި ސްޕިނެޗް ކިލޯއެއް 60 ރުފިޔާއަށް އަދި 153 ރުފިޔާއަށް ހުރި ރަތް މޭބިސްކަދުރު ކިލޯއެއް މިހާރު ލިބެން ހުރީ 139 ރުފިޔާއަށެވެ.
އެ ކުންފުނިން އާންމުކުރި އެހެނިހެން ބާވަތްތަކުގެ އަގުތަކަށް ބަލާއިރު، ބަށި ކިލޯއެއް 57 ރުފިޔާއަށް، ކެބެޖު 19 ރުފިޔާއަށް، ސްވީޓް ޕޮޓޭޓޯ 44 ރުފިޔާއަށް އަދި ބަރަބޯ ކިލޯއެއް 12 ރުފިޔާއަށް ލިބެން އެބަހުއްޓެވެ. މީގެ އިތުރުން ލޮނުމެދު ކިލޯއެއް 35 ރުފިޔާއަށް ހުރިއިރު، އިނގުރު ކިލޯއެއް ވިއްކަނީ 30 ރުފިޔާއަށެވެ.
މޭވާގެ ބާވަތްތަކަށް ބަލާއިރު، ދޮންކެޔޮ ކިލޯއެއް 30 ރުފިޔާއަށް، ފެހި އާފަލު 40 ރުފިޔާއަށް، ރަތް އާފަލު 42 ރުފިޔާއަށް، އޮރެންޖު 40 ރުފިޔާއަށް އަދި ލުނބޯ ކިލޯއެއް 22 ރުފިޔާއަށް ވަނީ ހަމަޖައްސާފައެވެ. ރާއްޖެއިން ބޭރުން ގެންނަ ޕެޝަން ފްރުޓް ކިލޯއެއް 104 ރުފިޔާއަށް ހުރިއިރު، ރާއްޖޭގައި ހައްދާ ޕެޝަން ފްރުޓް ލިބެން ހުރީ 88 ރުފިޔާއަށެވެ. އަދި އަނބު ކިލޯއެއް 120 ރުފިޔާއަށް، ފަޅޯ ކިލޯއެއް 30 ރުފިޔާއަށް، ކަރާ ކިލޯއެއް 17 ރުފިޔާއަށް އަދި ފެހި މިރުސް ކިލޯއެއް 74 ރުފިޔާއަށް ލިބެން އެބަހުއްޓެވެ.
މީގެ އިތުރުން، އެސްޓީއޯއިން ވިއްކާ މުގު ކިލޯއެއް 42 ރުފިޔާއަށް، ކާއްޓެއް 25 ރުފިޔާއަށް އަދި ބިހެއް 2 ރުފިޔާއަށް ލިބެން ހުންނާނެކަމަށް އެ ކުންފުނިން ވަނީ އާންމުކޮށްފައެވެ.
ކޮމެންޓު ފޮނުވާ