މިއަހަރުގެ ފިޠުރު ޢީދު ފާހަގަކުރުމުގެ ގޮތުން، ދިވެހިރާއްޖޭގެ ޤައުމީ ދިފާޢީ ބާރު (އެމްއެންޑީއެފް) އިން އިސްނަގައިގެން ސަރުކާރުގެ ކުންފުނިތަކާ ގުޅިގެން "ޢީދު ހަވީރު 1447″ ގެ ނަމުގައި ޚާއްސަ ހަރަކާތްތަކެއް ކުރިއަށް ގެންދިއުމަށް ނިންމައިފިއެވެ.
މި ހަރަކާތްތައް ކުރިއަށް ގެންދިއުމަށް ހަމަޖެހިފައިވަނީ ސިފައިންނާއި ފުލުހުންގެ އިތުރުން ސަރުކާރުގެ ނުވަ ކުންފުންޏެއްގެ ބައިވެރިވުމާއެކުގައެވެ. މިގޮތުން ސްޓެލްކޯ، އެމްޑަބްލިއުއެސްއީ، ވެމްކޯ، އެމްޕީއެލް، އެޗްޑީސީ، އެސްޓީއޯ، އެމްއޭސީއެލް، އާރުޑީސީ އަދި އެމްޓީސީސީން މި ހަރަކާތްތަކުގައި ޢަމަލީގޮތުން ބައިވެރިވާނެއެވެ. މި ހަރަކާތްތައް އޮންނާނީ މި ހިނގާ މަހުގެ 20 ވަނަ ދުވަހުގެ ހަވީރު 16:00 އިން 18:00 އަށެވެ.
މާލެއާއި ހުޅުމާލެ އަދި ވިލިމާލޭގައި އެއް ވަގުތެއްގައި މި ހަރަކާތްތައް ކުރިއަށްދާނެއެވެ. މާލޭގައި ހަރަކާތްތައް ފެތުރިފައިވަނީ ސަލްޓަން ޕާކުން ފެށިގެން އިސްލާމީ މަރުކަޒުގެ މައިދާނާއި، ޖުމްހޫރީ މައިދާން އަދި ރަސްމީ ބޮޑު ފާލަން ސަރަޙައްދަށެވެ. ހުޅުމާލޭގައި ސެންޓްރަލް ޕާކާއި ފޭސް 2 ގެ ހިޔާ ޕާކް ސަރަޙައްދުގައި ހަރަކާތްތައް ބޭއްވުމަށް ހަމަޖެހިފައިވާއިރު، ވިލިމާލޭގައި ޢީދު ހަވީރު އޮންނާނީ އެރަށު ފުޓްބޯޅަ ދަނޑުގައެވެ.
މި ޢީދު ހަވީރުގައި އާންމުންނާއި ކުޑަކުދިންނަށް ޚާއްސަ އެކި ކަހަލަ ކުޅިވަރުތަކާއި މުނިފޫހިފިލުވުމުގެ ހަރަކާތްތައް ކުރިއަށްދާނެއެވެ. އަދި ޢީދުގެ އުފާ ފާޅުކުރުމުގެ ގޮތުން، ހަރަކާތުގައި ބައިވެރިވާ ކުޑަކުދިންނަށާއި އާންމުންނަށް ޢީދު ހަދިޔާ ދިނުންވެސް މި ވަގުތުތަކުގައި ކުރިއަށްދާނެ ކަމަށް މަޢުލޫމާތު ލިބެއެވެ.
ކޮމެންޓު ފޮނުވާ