ހއ. އުލިގަމުގައި ތަރައްގީކުރުމަށް ހަމަޖެހިފައިވާ ޔޮޓް މެރީނާ ޑިޒައިންކޮށް، އެތަން އިމާރާތް ކޮށްދޭނެ ފަރާތެއް ހޯދުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އިއުލާނުކޮށްފިއެވެ.
މި މަޝްރޫއު ކުރިއަށް ގެންދިއުމަށް ޝައުގުވެރިވާ ފަރާތްތަކުން އަންދާސީ ހިސާބު ހުށަހެޅުމަށް އެ ކުންފުނިން ވަނީ ހުޅުވާލާފައެވެ. އިއުލާނުގައި ބަޔާންކޮށްފައިވާ ގޮތުން، މި މަސައްކަތަށް އަގު ހުށަހެޅުމުގެ ސުންގަޑިއަކީ އަންނަ ހޯމަ ދުވަހުގެ މެންދުރުފަހު 1:00 އެވެ. މި މަޝްރޫއަކީ އުލިގަމަށް ދާއިމީ ގޮތެއްގައި އިގްތިސާދީ ނަފާ ލިބޭނެ ގޮތަށް ފުޅާކުރެވޭނެ މަޝްރޫއަކަށް ހެދުމަކީ ސަރުކާރުގެ މައިގަނޑު އަމާޒެކެވެ.
އުލިގަމުގައި ޔޮޓް މެރީނާއެއް ތަރައްގީކުރުމުގެ މަސައްކަތަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، މިދިޔަ އަހަރުގެ ޖެނުއަރީ މަހު ހއ. އަތޮޅަށް ކުރެއްވި ދަތުރުފުޅުގައި އިއުލާންކުރެއްވި މަސައްކަތެކެވެ. އެ ދަތުރުފުޅުގައި އުލިގަމު ރައްޔިތުންނާ ބައްދަލުކުރައްވައި ރައީސް ވަނީ، އެމްޕީއެލްއާ އެކު އެމްއޯޔޫއެއްގައި ސޮއިކުރެވިފައިވާކަން ހާމަކުރައްވާފައެވެ.
ރާއްޖޭގެ އެންމެ އުތުރުގައި އޮންނަ އުލިގަމަކީ ސްރީ ލަންކާ، އިންޑިއާ، މެލޭޝިއާ އަދި ތައިލެންޑް ފަދަ ގައުމުތަކުން ރެޑްސީ ހުރަސްކޮށް ޔޫރަޕަށް ދަތުރުކުރާ ގިނަ އަދަދެއްގެ ޔޮޓުތައް މަޑުކޮށްލާ މަންޒިލެކެވެ. ތަފާސްހިސާބުތައް ދައްކާ ގޮތުން އަހަރަކު ގާތްގަނޑަކަށް 100 އާއި 150 އާ ދެމެދުގެ އަދަދަކަށް ޔޮޓު އެ ރަށަށް ބަނދަރުކުރެއެވެ. ނަމަވެސް، އެ އުޅަނދުތަކަށް ބޭނުންވާ ޚިދުމަތްތައް އެކަށީގެންވާ ގޮތެއްގައި މިހާތަނަށް ފޯރުކޮށްދެވިފައި ނުވާތީ، އާ މެރީނާއާ އެކު މިކަމަށް ބޮޑު ހައްލެއް ލިބިގެންދާނެއެވެ.
މި މަޝްރޫއާ ގުޅޭގޮތުން އެމްޕީއެލްގެ ސީއީއޯ މުހައްމަދު ވަޖީހު އިބްރާހީމް މީގެ ކުރިން ވިދާޅުވެފައިވަނީ، މެރީނާ ހެދުމަށް ތުރުކީއާއި ޗައިނާގެ ކުންފުނިތަކުން ޝައުގުވެރިކަން ފާޅުކޮށްފައިވާ ކަމަށެވެ. އަދި ކޮންޓްރެކްޓާ ފައިނޭންސް އުސޫލުން ބޭރުގެ ބަޔަކު ލައްވައި މި ތަން ތަރައްގީކުރި ނަމަވެސް، މެރީނާ ހިންގުމުގެ ކަންކަން ކުރިއަށް ގެންދާނީ އެމްޕީއެލްއިން ކަމަށް އޭނާ ވަނީ ވިދާޅުވެފައެވެ.
ކޮމެންޓު ފޮނުވާ