ކީރިތި ޤުރުއާން ހިތުދަސްކޮށްގެން، އައްޑޫ ސިޓީއަށް ނިސްބަތްވާ ހަތަރު މީހަކާ އެކު ޖުމްލަ 31 ހާފިޒަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރޭ ސަނަދު ދެއްވައިފިއެވެ.
އިސްލާމީ މަރުކަޒުގެ ޖަލްސާކުރާ މާލަމުގައި ރޭ ބޭއްވި މި ޚާއްޞަ ރަސްމިއްޔާތުގައި ސަނަދު ޙާސިލުކުރި 31 ހާފިޒުންގެ ތެރޭގައި ހިމެނެނީ 19 އަންހެން ހާފިޒުންނާއި 12 ފިރިހެން ހާފިޒުންނެވެ. މީގެ ތެރެއިން 23 ހާފިޒުންނަކީ އުމުރުން 12 އަހަރާއި 21 އަހަރާ ދެމެދުގެ ޒުވާން ކުދިން ކަމަށްވާއިރު، ބާކީ ތިބި 8 ހާފިޒުންނަކީ 21 އަހަރުން މަތީގެ މީހުންނެވެ.
މި ރަސްމިއްޔާތުގައި ސަނަދު ލިބުނު އައްޑޫ ސިޓީގެ ހަތަރު ހާފިޒުންގެ ތެރޭގައި އެކި އުމުރުފުރައިގެ މީހުން ހިމެނެއެވެ. އެގޮތުން ސ. މަރަދޫ ތަޙްފީޒް ސެންޓަރުން ޤުރުއާން ހިތުދަސްކުރި އުމުރުން 14 އަހަރުގެ ނަވާރު ބިންތި އަޙްމަދާއި، މަރަދޫ ތަދުރީސުލް ޤުރްއާން ކުލާހުން ހިތުދަސްކުރި އުމުރުން 13 އަހަރުގެ މަލްކާ މުޙައްމަދު ޙަބީބު ހިމެނެއެވެ. މީގެ އިތުރުން ސ. ހިތަދޫ އައިއާރު ޤުރްއާން ކުލާހުން ޤުރުއާން ހިތުދަސްކުރި އުމުރުން 62 އަހަރުގެ ޙައްވާ ޒާހިރާ އާއި، މާލޭގައި ހުންނަ ޤައުމީ މަރުކަޒުގެ ޙިފްޒު ކުލާހުން ހިތުދަސްކުރި ހިތަދޫ، ޕޫލްވާރީގޭ، އުމުރުން 51 އަހަރުގެ މަޢުޞޫމާ މުޙައްމަދު ވެސް ވަނީ ސަނަދު ހާސިލުކޮށްފައެވެ.
މި ހާފިޒުންނަކީ 1446 ވަނަ އަހަރުގެ ރަމަޟާން މަހުން ފެށިގެން 1447 ވަނަ އަހަރުގެ ރަމަޟާން މަހާ ހަމައަށް، ކީރިތި ޤުރުއާނާ ބެހޭ ޤައުމީ މަރުކަޒުން ކަނޑައަޅާފައިވާ ޝަރުޠުތަކާ އެއްގޮތަށް ޙިފްޒު އިމްތިޙާނު ކޮމިޓީއަށް ކިޔައިދީގެން ދަސްވެނިވި ފަރާތްތަކެވެ. ހާފިޒުންގެ އަގުވަޒަންކުރުމުގެ ގޮތުން ސަރުކާރުން މިހާރު ވަނީ އެ ފަރާތްތަކަށް ދޭ އެލަވަންސް ބޮޑުކޮށްފައެވެ. އެގޮތުން ކުރިން ދެމުން އައި 2000 ރުފިޔާގެ ބަދަލުގައި، މިހާރު ހާފިޒުންނަށް މަހަކު 4000 ރުފިޔާގެ އެލަވަންސެއް ސަރުކާރުން ދަނީ ފޯރުކޮށްދެމުންނެވެ.
ކޮމެންޓު ފޮނުވާ