މުދަލު ޒަކާތް ނަގަން ފެށިފަހުން އެންމެ ގިނަ އަދަދަކަށް ޒަކާތް ލިބިފައިވަނީ ނިމިދިޔަ 2025 ވަނަ އަހަރު ކަމަށް، މޯލްޑިވްސް ޒަކާތު ހައުސްއިން މިއަދު އާންމުކުރި ތަފާސްހިސާބުތަކުން ދައްކައިފިއެވެ. ޒަކާތު ހައުސްއިން އާންމުކޮށްފައިވާ ވޭތުވެދިޔަ ފަސް އަހަރުގެ (2021 އިން 2025 އަށް) ތަފާސްހިސާބުތަކަށް ބަލާއިރު، މި މުއްދަތުގެ ތެރޭގައި ކޮންމެ އަހަރަކުވެސް 90 މިލިއަން ރުފިޔާއަށްވުރެ އިތުރަށް ޒަކާތުގެ ގޮތުގައި ލިބިފައިވެއެވެ.
އެގޮތުން އެންމެ ގިނައިން ޒަކާތް ލިބުނު އަހަރު ކަމަށްވާ 2025 ވަނަ އަހަރު، މުދަލު ޒަކާތުގެ ގޮތުގައި 107.21 މިލިއަން ރުފިޔާ ލިބިފައިވެއެވެ. އޭގެ ކުރިން 2024 ވަނަ އަހަރު 102.28 މިލިއަން ރުފިޔާ ލިބުނުއިރު، ތިންވަނައަށް އެންމެ ގިނައިން ލިބުނު 2022 ވަނަ އަހަރު ލިބިފައިވަނީ 92.70 މިލިއަން ރުފިޔާއެވެ. ތަފާސްހިސާބުތައް ދައްކާގޮތުން ފާއިތުވި ފަސް އަހަރުގެ ތެރޭގައި މުދަލު ޒަކާތުގެ ގޮތުގައި ޖުމުލަ 483.79 މިލިއަން ރުފިޔާ ދައުލަތަށް ލިބިފައިވެއެވެ.
ޒަކާތުގެ އަދަދުތައް އިތުރުވެފައިވާއިރު، މުދަލު ޒަކާތް ނެރުން ވާޖިބުވާ ނިޞާބަށްވެސް ޒަކާތު ހައުސްއިން ވަނީ ބަދަލު ގެނެސްފައެވެ. އެގޮތުން މިދިޔަ ޑިސެންބަރު މަހުގެ 21 ވަނަ ދުވަހު ކަނޑައެޅި އައު ނިޞާބަކީ 19،527.90 ރުފިޔާއެވެ. މިއީ އޭގެ ފަސް މަސް ކުރިން ނިޞާބު ހުރި މިންވަރު ކަމުގައިވާ 11،191.95 ރުފިޔާއާ އަޅާބަލާއިރު 8،335.95 ރުފިޔާގެ ބޮޑުވުމެކެވެ. މިއީ ރާއްޖޭގައި މިހާތަނަށް ކަނޑައެޅި އެންމެ މަތީ ނިޞާބުގެ އަދަދު ކަމަށްވާއިރު، މި ބަދަލު ގެނެސްފައިވަނީ ދުނިޔޭގެ ބާޒާރުގައި ރިހީގެ އަގަށް އަންނަ ބަދަލުތަކާ ގުޅިގެންނެވެ.
މުދަލު ޒަކާތުގެ ނިޞާބަކީ ތިމާގެ އަތުގައި ހުރި މުދަލުގައި އެ މިންވަރެއް ހަމަވުމުން ޒަކާތް ނެރުން ވާޖިބުވާ އެންމެ ދަށް މިންވަރެވެ. ފާހަގަކޮށްލެވޭ ގޮތުގައި މުދަލު ޒަކާތް ދެއްކުމަކީ ގާނޫނީ ގޮތުން ލާޒިމު ކަމެއްގެ ގޮތުގައި ކަނޑައަޅައި، އެކަމާ ގުޅޭ ގާނޫނަށް އަމަލުކުރަން ފަށާފައިވަނީ ހިނގަމުންމިދާ އަހަރުގެ ތެރޭގައެވެ.
ކޮމެންޓު ފޮނުވާ