އީރާނުގެ ސަރުކާރާ ދެކޮޅަށް ކުރަމުންދާ މުޒާހަރާތަކުގައި މިހާތަނުން މަރުވެފައިވާ މީހުންގެ އަދަދު 2،000 އަށް އަރައިފިކަމަށް މީޑިއާތަކުން ރިޕޯޓު ކޮށްފިއެވެ. ރޮއިޓަރސް ނޫހުން ހާމަކޮށްފައިވާ ގޮތުގައި، މަރުވި މީހުންގެ ތެރޭގައި ސަލާމަތީ ބާރުތަކުގެ އޮފިސަރުން ވެސް ހިމެނެއެވެ.
އަދި އެ މަރުތަކުގެ ފަހަތުގައި ތިބީ، މުޒާހަރާކުރުމުގެ ނިވަލަށް ވަދެ، މުޒާހަރާގެ ބައިވެރިންނަށާއި ސަލާމަތީ ބާރުތަކަށް ޙަމަލާދެމުންދާ ނިރުބަވެރި ބަޔަކު ކަމަށް ވެސް ރޮއިޓަރސްއަށް މައުލޫމާތުދިން ފަރާތުން ތުހުމަތުކުރެއްވިއެވެ.
އީރާނުގައި ތަކެތީގެ އަގުތައް އިންތިހާއަށް އުފުލިފައިވާތީ އެ ކަމާ ދެކޮޅަށް އެ ޤައުމުގެ ރައްޔިތުން މުޒާހަރާތައް ފެށީ މިދިޔަ މަހުގެ ފަހުކޮޅެވެ. އެ މުޒާހަރާތައް މިހާރު އެކި ސަރަޙައްދުތަކަށް ފެތުރިފައިވާއިރު، އީރާންގެ ބޮޑު ސަރަޙައްދަކަށް އިންޓަރނެޓުގެ ޚިދުމަތް ވެސް ވަނީ ކަނޑާލައިފައެވެ.
މުޒާހަރާތައް ހުއްޓުވަން އެކަށީގެންނުވާ ބާރުގެ ބޭނުންކުރާނަމަ، މުޒާހަރާގެ ބައިވެރިންގެ ދިފާޢުގައި އެމެރިކާއިން އީރާނަށް އަރާނެކަމުގެ އިންޒާރު، އެމެރިކާގެ ރައީސް ޑޮނަލްޑް ޓްރަމްޕް ގެންދަވަނީ ތަކުރާރުކޮށް ދެއްވަމުންނެވެ. މިގޮތުން، ޓްރަމްޕް އިއްޔެ ވަނީ އީރާނާ އެކު ވިޔަފާރީގެ ގުޅުން ބާއްވާ ޤައުމުތަކުން އެމެރިކާއަށް ބޭރުކުރާ މުދަލުން 25 ޕަސެންޓުގެ ޑިޔުޓީއެއް ނަގާނެކަމުގެ އިންޒާރު ދެއްވައިފައެވެ. އެ ނިންމުމާ ގުޅިގެން ޗައިނާ އަދި ރަޝިޔާގެ ފާޑުކިޔުން އެމެރިކާއަށް ވަނީ އަމާޒުވެފައެވެ.
އެމެރިކާއިން އީރާންގެ ދާޚިލީ ކަންކަމަށް ބާރުފޯރުވުމަށް މަސައްކަތް ކުރަމުންދާ ކަމަށް ވެސް އީރާނުން ތުހުމަތުކޮށްފައިވެއެވެ. އީރާނުން ޤަބޫލުކުރާ ގޮތުގައި އެ ޤައުމުގައި ކުރަމުންދާ މުޒާހަރާތައް ބޭނުންކޮށްގެން ކަންތައްތަކެއް ޙާޞިލް ކުރުމަށް ބޭރުގެ ޤައުމުތަކުން ދަނީ މަސައްކަތްކުރަމުންނެވެ. މުޒާހަރާތަކުގައި މީހުން މަރުވަނީ ވެސް އެމެރިކާއިން މައްސަލައިގެ ތެރެއަށް ވަނުމުން ކަމަށް އެ ޤައުމުން ވަނީ ބުނެފައެވެ.
ކޮމެންޓު ފޮނުވާ