ފައިސާގެ އަގު ވެއްޓުމާ ގުޅިގެން އީރާނުގައި ފަސް ދުވަހަށްވުރެ ގިނަ ދުވަހު ކުރިއަށްދާ މުޒާހަރާތަކުގައި ދެ މީހަކު މަރުވެއްޖެ ކަމަށް ރިޕޯޓްތައް ބުނެފިއެވެ. އިންސާނީ ހައްގުތަކާ ބެހޭ ޖަމާއަތް ހެންގާއިން ބުނި ގޮތުގައި މަރުވި ދެ މީހުންނަކީ އަހްމަދު ޖަލީލް އާއި ސައްޖާދު ވަލަމަނޭޝް ކިޔާ، މުޒާހަރާގެ ދެ ބައިވެރިންނެވެ.
އީރާނުގެ ހުޅަނގު ދެކުނުގައި ހުންނަ ލޯރްޑެގަން ސިޓީގައި ހިނގި މުޒާހަރާތަކުގައި މުޒާހަރާ ބައިވެރިންނާއި ސަލާމަތީ ބާރުތަކާ ދެމެދު ބޮޑެތި ކުރިމަތިލުންތައް ހިނގާފައި ވެއެވެ. ސޯޝަލް މީޑިއާގައި އާންމުވި ވީޑިއޯތަކުން ދައްކާ ގޮތުގައި މަގުމަތީގައި ޕާކްކޮށްފައި އޮތް ކާރުތަކުގައި އަލިފާން ރޯކޮށް، ސަރުކާރު އިމާރާތްތަކަށް ވެސް ގެއްލުންދީފައި ވެއެވެ.
ދިރިއުޅުމުގެ ޚަރަދު އުފުލުމާ ގުޅިގެން ފެށުނު މި މުޒާހަރާތަކުގައި ބައެއް މީހުން ވަނީ އިރާނުގެ ސުޕްރީމް ލީޑަރު އިސްތިއުފާ ދިނުމަށް ގޮވާލާފައެވެ. އަދި ބައެއް ބައިވެރިން ވަނީ ޑިމޮކްރަސީގެ ބަދަލުގައި ރަސްކަން އަލުން ގާއިމްކުރުމަށް ވެސް ގޮވާލާފައެވެ. ފާރސް ނިއުސް އެޖެންސީ އާއި ހެންގާ ޖަމާއަތުން ވަނީ މި މައުލޫމާތު ކަށަވަރުކޮށްދީފައެވެ.
ކޮމެންޓު ފޮނުވާ