ބައިނަލްއަގްވާމީ އިންސާނީ ހައްގުތަކުގެ ދުވަހުގެ މުނާސަބަތުގައި ރައީސް ޑރ. މުހައްމަދު މުއިއްޒު ނެރުއްވި މެސެޖެއްގައި، ނާޒުކު ހާލަތުގައި ދިރިއުޅޭ މީހުންގެ ހާލަތު ރަނގަޅުކުރުމަށް މުއައްސަސާތައް ބަދަހިކުރުމުގެ މަސައްކަތް ކުރިއަށްދާނެ ކަމުގައި ރައީސް ވިދާޅުވެއްޖެއެވެ.
ތައުލީމާއި ސިއްހީ ޚިދުމަތާއި އިޖްތިމާއީ ރައްކާތެރިކަން ފަދަ އަސާސީ ޚިދުމަތްތައް މިހާރަށްވުރެ ފުޅާކުރުމަށް ސަރުކާރުން މަސައްކަތްކުރާނެ ކަމަށާއި، މުޖުތަމަޢުގައި ނާޒުކު ހާލަތުގައި ތިބި ފަރުދުން ހިމާޔަތްކުރުމަށް ގާނޫނީ އަދި މުއައްސަސާތަކުގެ އޮނިގަނޑުތައް ވަރުގަދަކުރާނެ ކަމަށް ރައީސް ވިދާޅުވިއެވެ.
ރައީސް އޮފީހުގެ ވެބްސައިޓްގައި ޝާއިއުކުރި މެސެޖުގައި، އދ. އިންސާނީ ހައްގުތަކާ ބެހޭ ކައުންސިލްގައި ރާއްޖެ ވަރަށް އިސް ސަފުގައި ހަރަކާތްތެރިވަމުންދާ ކަމަށާއި، އިންސާނީ ހައްގުތަކަކީ ސަރަހައްދީ އިމެއް ނެތް ކަމެއް ކަމުން ގައުމުތަކުން ގުޅިގެން މަސައްކަތްކުރަން ޖެހޭ ކަމަށް ރައީސް ފާހަގަކުރެއްވިއެވެ. ބައިނަލްއަގްވާމީ މުއާމަލާތްތައް ހަރުދަނާކޮށް ހައްގުތައް ރައްކާތެރިކުރުމުގެ މަޝްވަރާތަކުގައި ރާއްޖެއިން ވަރަށް ހަރަކާތްތެރިވާނެ ކަމުގެ ޔަގީންކަން ރައީސް މެސެޖުގައި ދެއްވިއެވެ.
ކޮމެންޓު ފޮނުވާ