ދިވެހިރާއްޖޭގެ 57 ވަނަ ޖުމްހޫރީ ދުވަހުގެ މުނާސަބަތުގައި ރައްޔިތުންނަށް ތަހުނިޔާ ވިދާޅުވަމުން ރައީސް ޑރ.މުހައްމަދު މުއިއްޒު ވަނީ ތަމައްދުނާއި ތަރައްޤީގެ އުޖާލާ ދުވަސްތަކެއް ގައުމަށް ހޯދައިދެއްވާނެކަމުގެ ފުރިހަމަ ޔަގީންކަން ދެއްވާފައެވެ.
ސޯޝަލް މީޑިއާގައި ހިއްސާކުރެއްވި ޚާއްސަ މެސެޖެއްގައި ރައީސް ވިދާޅުވީ ދިވެހިންގެ ރާއްޖެ ދިވެހީންނަށް ހޯދައިދިނުމަށް ސަރުކާރުން ފަށާފައިވާ ދަތުރުގައި މާތްﷲގެ ހަޟްރަތުން އިޚްލާސްތެރިކަމާއެކު ކުރިއަށްދާނެކަމަށެވެ. ރައްޔިތުންގެ ބަދަހިކަމާއި އެއްބާރުލުމަށް ފަށްފަށުން ޝުކުރު އަދާކުރައްވަމުން އެމަނިކުފާނު ވަނީ ދިވެހި ރައްޔިތުން ފަޚުރުވެރިވާނޭ ތަމައްދުނާއި ތަރައްޤީގެ ދުވަސްތަކެއް މި ޤައުމަށް ހޯދައިދެއްވާނެކަމުގެ ޔަގީންކަން ދެއްވާފައެވެ.
ރާއްޖޭގައި ކޮންމެ އަހަރެއްގެ ނޮވެންބަރު 11 ވަނަ ދުވަހަކީ ދެވަނަ ޖުމްހޫރިއްޔާ ޤާއިމުކުރެވުނު ދުވަހަށްވާތީ ޖުމްހޫރީ ދުވަހަކަށް ފާހަގަކުރާ ދުވަހެކެވެ. ޤައުމީ މި ދުވަހުގެ މުނާސަބަތުގައި ދިވެހި ޤައުމަށް ބާއްޖަވެރިކަމާއި ފާގަތިކަން ދެއްވުން އެދި ރައީސް ވަނީ ދުޢާ ކުރައްވާފައެވެ.
ކޮމެންޓު ފޮނުވާ