ޖެނީވާގައި ބޭއްވި އދ.ގެ ޔުނިވާސަލް ޕީރިއަޑިކް ރިވިއުގެ ސެޝަންގައި އެޓާނީ ޖެނެރަލް އަހުމަދު އުޝާމް ވިދާޅުވީ، ރާއްޖޭން އިންސާނީ ހައްގުތައް ކަށަވަރުކޮށްދެއްވާނީ އިސްލާމްދީނާ ހިލާފު ނުވާ ގޮތަށް ކަމަށެވެ.
އޭޖީ ވަނީ އިސްލާމްދީނަކީ ރާއްޖޭގެ އައިޑެންޓިޓީއާ ގުޅިފައިވާ، އިޖުތިމާއީ ފޭރާމުގެ ކޮމްޕްރޮމައިޒް ނުކުރެވޭނެ ރުކުނެއް ކަމަށް ފާހަގަކުރައްވާފައެވެ. އުޝާމް ވިދާޅުވީ ރާއްޖޭގެ ވެލިއުތައް ބައްޓަންކުރަނީ އިސްލާމްދީނުން ކަމަށާއި ގާނޫނުތަކަށް މައުލޫމާތު ނަގަނީ ވެސް އެ ދީނުން ކަމަށެވެ. އިންސާނީ ހައްގުތަކަށް ދޭ ކޮމިޓްމެންޓް އޮންނާނީ އިސްލާމީ އުސޫލުތަކާ އެއްގޮތަށް ކަމަށް ވެސް އޭނާ ވަނީ ބުނެފައެވެ.
ބަންޑާރަ ނައިބު ވިދާޅުވި ގޮތުގައި ވިސްނުމާއި ހިޔާލުފާޅުކުރުމުގެ މިނިވަންކަން ގާނޫނުއަސާސީން ކަށަވަރުކޮށްދޭ ނަމަވެސް، އެ ހައްގު ލިބިދޭނީ އިސްލާމްދީނުގެ އަސްލަކާ ހިލާފު ނުވާ ގޮތަށް ކަމަށެވެ. މަދަނީ މިނިވަންކަން ބޭނުންކުރަން ޖެހޭނީ ގައުމުގެ ހަމަޖެހުން އޮންނާނެ ގޮތަށް، ނަފުރަތު ނުފެތުރޭނެ ގޮތަކަށް ކަމަށް ވެސް އޭޖީ ވަނީ ވިދާޅުވެފައެވެ.
104 ގައުމަކުން ބައިވެރިވި މި ރިވިއު ސެޝަންގައި، ރާއްޖެ އިން އިންސާނީ ހައްގުތައް ރައްކާތެރި ކުރުމުގައި ހާސިލްކޮށްފައިވާ ކާމިޔާބީތަކާއި ފާއިތުވި ސައިކަލްގެ ރެކޮމެންޑޭޝަންތައް ތަންފީޒުކުރުމަށް ކޮށްފައިވާ މަސައްކަތް ބައިނަލްއަގުވާމީ މުޖުތަމައުން ވަނީ ބަލައިގެންފައެވެ. އަންހެނުންނާއި ކުދިންނާއި މުޖުތަމައުގެ ހާއްސަ އެހީތެރިކަން ބޭނުންވާ މީހުންގެ ހައްގުތައް ރައްކާތެރިކުރުމަށް ކުރާ މަސައްކަތްތަކާއި މޫސުމީ ބަދަލުތަކާ ގުޅޭ މަސައްކަތްތައް ވެސް ރިވިއުގައި ވަނީ ހިއްސާކޮށްފައެވެ. ރާއްޖޭގެ ޔޫޕީއާރު ރިވިއު ދެން އޮންނާނީ 2030 ގައެވެ.
ކޮމެންޓު ފޮނުވާ