މޯލްޑިވްސް ކަސްޓަމްސް ސަރވިސްއަށް އިމްޕޯޓް ޑިއުޓީގެ ގޮތުގައި ލިބެންޖެހޭ 2.2 މިލިއަން ރުފިޔާ ހޯދުމަށް އެ ކުންފުންޏަށް އެންގުމަށް ރައްޔިތުންގެ މަޖިލީހުގެ މާލިއްޔަތު ކޮމެޓީގެ ސަބް ކޮމެޓީއިން ނިންމައިފިއެވެ. މި ނިންމުން ނިންމާފައިވަނީ ކަސްޓަމްސް ސަރވިސްގެ 2012 އިން 2019 އަށް ހެދިފައިވާ އޮޑިޓް ރިޕޯޓުތައް މާލިއްޔަތު ކޮމިޓީގެ ސަބް ކޮމިޓީން ދިރާސާކުރުމަށްފަހުގައެވެ.
ސަބް ކޮމިޓީގެ ރިޕޯޓުގައި މައިގަނޑު ގޮތެއްގައި ފާހަގަކޮށްފައިވާ ކަންތައްތަކުގެ ތެރޭގައި، ރާއްޖޭގައި ބޭނުންކުރުމަށްފަހު އަނބުރާ ގެންދާ ގޮތަށް އިމްޕޯޓުކުރާ މުދާ ރާއްޖެއިން ބޭރުގެ ފަރާތެއް ޒިންމާވާ ގޮތަށް ދޫކޮށްފައިވާ މައްސަލަ ހިމެނެއެވެ. މިކަމުގެ ސަބަބުން އިމްޕޯޓް ޑިއުޓީގެ ގޮތުގައި ލިބެންޖެހޭ 2,236,997 ރުފިޔާ ހޯދުމަށް ކަސްޓަމްސްއަށް އެންގުމަށް ސަބް ކޮމިޓީން ހުށަހަޅާފައިވެއެވެ.
މީގެއިތުރުން، ހަރުމުދަލުގެ ރަޖިސްޓްރީ ފުރިހަމަކޮށް، އެރަޖިސްޓްރީގައިވާ އަދަދުތަކުގެ ސައްޙަކަން ކަށަވަރުކުރުމަށާއި، މާލީ ބަޔާނުގައި އެމަޢުލޫމާތު ހިމެނުމަށާއި، މިނިސްޓްރީ އޮފް ފިނޭންސްގެ ޕަބްލިކް އެކައުންޓިންގ ސިސްޓަމްގައި އެމަޢުލޫމާތު ރެކޯޑުކޮށް ބެލެހެއްޓުމަށް ކަސްޓަމްސްއަށް އެންގުމަށްވެސް ސަބް ކޮމިޓީން ހުށަހަޅާފައިވެއެވެ.
ސަބް ކޮމިޓީގެ ރިޕޯޓުގައި އިތުރަށް ފާހަގަކޮށްފައިވަނީ، އޮޑިޓް ރިޕޯޓުގައި ފާހަގަކޮށްފައިވާ ގާނޫނާއި ގަވާއިދާ ޚިލާފު ކަންތައްތައް ކުރިމަގުގައި ތަކުރާރުނުވާނެ ގޮތަށް އިސްލާހުކުރުމަށް އޮޑިޓަރ ޖެނެރަލް ލަފާ ދީފައިވާ ގޮތަށް އަމަލުކުރުމަށް އެންގުމުގެ މުހިއްމުކަމެވެ. އަދި ކުރިމަގުގައި ކަސްޓަމްސް އޮޑިޓްކުރާއިރު، އެ ސަރވިސްގެ އޮޑިޓް ރިޕޯޓުގައި ފާހަގަކޮށްފައިވާ ކަންތައްތަކަށް އިސްލާހީ ފިޔަވަޅުތައް އަޅާފައިވާ މިންވަރު ބެލުމަށް އޮޑިޓަރ ޖެނެރަލަށް އެންގުމަށްވެސް ސަބް ކޮމިޓީން ހުށަހަޅާފައިވެއެވެ.
މާލިއްޔަތު ކޮމެޓީގެ ސަބް ކޮމިޓީގެ މެންބަރުން މި ރިޕޯޓުގައި ފާހަގަކުރެއްވި އެހެން މުހިއްމު ކަމެއްގެ ގޮތުގައި، ދައުލަތުގެ ކުންފުނިތަކުގެ މާލީ ހިސާބުތައް ވަގުތުން ވަގުތަށް ލިބެމުން ނުދާކަމުގެ ކަންބޮޑުވުން ހިމެނެއެވެ.
ކޮމެންޓު ފޮނުވާ