ރާއްޖެއަށް 200 މާސްޓަރ ކާޓަން މެންޗެސްޓަރ ސިނގިރޭޓް ސިއްރުން އެތެރެކުރި މައްސަލައެއް ދިވެހި ފުލުހުންގެ ޚިދުމަތާއި މޯލްޑިވްސް ކަސްޓަމްސް ސަރވިސްއިން ގުޅިގެން ތަހުގީގުކުރަން ފަށައިފިއެވެ.
ފުލުހުން ހާމަކުރި ގޮތުގައި މި މައްސަލައިގެ ތުހުމަތުގައި ވަނީ ދަ ހޯކްސް ޕްރައިވެޓް ލިމިޓެޑްގެ ފޮރިންގޮއިންގ އުޅަނދެއް ކަމަށްވާ ދަ ހޯކްސް ޖަވާހިރު ބޯޓެވެ. މި ބޯޓުން 2024 އޮކްޓޯބަރ 24 ވަނަ ދުވަހު ރާއްޖެއަށް އައިއިރު، ބޯޓުގެ މެނިފެސްޓުގައި މި ސިނގިރޭޓްތައް ހިމަނާފައި ނުވާކަން ވަނީ ފާހަގަކުރެވިފައެވެ. އޭގެ އަނެއް ދުވަހު، އެބައި 2024 އޮކްޓޫބަރު 25 ވަނަ ދުވަހުގެ ރޭގަނޑުގެ ވަގުތެއްގައި ކ. ތިލަފުށީގައި ހުންނަ ހޯކްސް ބޯޓު ޔާޑުގެ ޖެޓީއަށް ބާލައި، ސިއްރުން ދިވެހިރާއްޖެއަށް އެތެރެކޮށްފައިވެއެވެ.
މި މައްސަލައިގެ ތަހުގީގު ބިނާވެފައިވަނީ ދެ ބާވަތެއްގެ ކުށުގެ މައްޗަށެވެ. އެއީ ކަސްޓަމްސްގެ ގާނޫނުގެ ދަށުން ދިވެހިރާއްޖެއަށް ސިއްރުން މުދާ އެތެރެކުރަން އުޅުމުގެ ކުށާއި، މަނީ ލޯންޑްރިންގ އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން މަނީ ލޯންޑްރިންގ ކުށެވެ.
