ހައި-ޕްރޮފައިލް މައްސަލަތައް ބެއްލުމަށް މަޝްހޫރު އީރާނުގެ ސުޕްރީމް ކޯޓުގެ ދެ ފަނޑިޔާރަކު، ތެހެރާންގައި ބަޑިޖަހައި މަރާލައިފިއެވެ. ދެ ފަނޑިޔާރުންނަށް ބަޑިން ހަމަލާދިން މީހާވަނީ އަމިއްލައަށް މަރުވެފައެވެ.
ސަރުކާރާ ގުޅުންހުރި މީޑިއާތަކުން ޝަރުޢީ ދާއިރާގެ މީޑިއާ އޮފީހާ ހަވާލާދީ ބުނެފައިވާ ގޮތުގައި، ހަމަލާދިން ފަރާތުގެ އެއްވެސް މައްސަލައެއް ކޯޓުގައި ނުހިނގައެވެ. މި ހާދިސާގެ ތަފްސީލު އަދިވެސް ސާފުވެފައި ނުވިނަމަވެސް، އީރާނުގެ ޝަރުޢީ ދާއިރާއިން ބުނެފައިވަނީ ހަމަލާދިން ފަރާތުން "ރޭވިގެން" ކޯޓު ތެރޭގައި ދެ އިސް ފަނޑިޔާރުން މަރާލުމަށްފަހު ފިލަން މަސައްކަތްކޮށް، އޭގެފަހުން އަމިއްލައަށް މަރުވެފައިވާ ކަމަށެވެ.
މިޒާން ނިއުސް އޭޖެންސީގައިވާ ގޮތުން، ޝަރުޢީ ދާއިރާގެ ސްޕޯކްސްޕަރސަން އަސްޣަރު ޖަހާންގީރު ބުނެފައިވަނީ މި ހަމަލާގައި ސެކިއުރިޓީ ބަލަހައްޓާ މުވައްޒަފަކު ޒަޚަމުވެފައިވާ ކަމަށެވެ. ފަނޑިޔާރު މުޙައްމަދު މޮޣީޝާއި ފަނޑިޔާރު އަލީ ރަޒީނީއަކީ އެތައް އަހަރެއް ވަންދެން މުޒާހަރާކުރާ މީހުންނާއި، ކަލާކާރުންނާއި އެކްޓިވިސްޓުންގެ މައްސަލަތައް ބެލި ތަޖުރިބާކާރު ފަނޑިޔާރުންނެވެ.
މޮޣީޝާއަކީ "ގިނަގުނަ އިންސާފުވެރިނޫން ޝަރީޢަތްތައް ހިންގުމާއި، ދަޢުވާތައް ސާބިތުނުކޮށް އަދި ހެކިތަކަށް ރިއާޔަތްނުކޮށް" ޝަރީޢަތް ހިންގުމުގެ ސަބަބުން 2019 ގައި އެމެރިކާއިން ފިޔަވަޅު އަޅާފައިވާ ފަނޑިޔާރެކެވެ. އަދި އޭގެ 8 އަހަރު ކުރިން ޔޫރަޕިއަން ޔޫނިއަނުން ވެސް އޭނާގެ މައްޗަށް ފިޔަވަޅު އަޅާފައިވެއެވެ.
އެންމެ މައްސަލައެއްގައި އޭނާ ވަނީ ސަރުކާރާ ދެކޮޅަށް ޕަބްލިސިޓީ ހޯދުމާއި ދީނަށް ފުރައްސާރަކުރުމުގެ ކުށުގައި އީރާނުގެ ފޭސްބުކް ބޭނުންކުރާ 8 ފަރާތަކަށް ޖުމްލަ 127 އަހަރުގެ ޖަލު ހުކުމް އިއްވާފައެވެ. އެމެރިކާގެ ޓްރެޜަރީ ޑިޕާޓްމަންޓުން ބުނެފައިވާ ގޮތުން، އޭނާ ވަނީ "ދައުލަތާ ދެކޮޅަށް ޕްރޮޕެގެންޑާ" ފެތުރުމުގެ ކުށުގައި ފިލްމު ހަދާ މީހުންނާއި ޝާޢިރުންގެ މައްސަލަތައްވެސް ބަލާފައެވެ. އެމްނެސްޓީ އިންޓަނޭޝަނަލްއިން ބުނެފައިވާ ގޮތުން، 2019 ގައި އޭނާ ވަނީ އީރާނުގެ ފާހަގަކޮށްލެވޭ އިންސާނީ ޙައްޤުތަކުގެ ވަކީލު އަދި އަންހެނުންގެ ޙައްޤުތަކަށް ވަކާލާތުކުރާ ނަސްރީން ސޮޓޫދާއަށް 33 އަހަރުގެ ޖަލު ހުކުމަކާއި 148 އެތިފަހަރުން ހައްދު ޖެހުމަށްވެސް ޙުކުމް އިއްވާފައެވެ.
އީރާނުގެ ފާރްސް ނިއުސް އޭޖެންސީން ބުނެފައިވާ ގޮތުން، 1999 ގައި ރަޒީނީގެ އުޅަނދަށް ބޮމެއް ހަރުކޮށްގެން އޭނާ މަރާލަން މަސައްކަތްކުރި ނަމަވެސް އޭނާ ސަލާމަތްވިއެވެ. އީރާނުގެ ކުރީގެ ރައީސް އިބްރާހިމް ރައިސީއާއެކު، އޭނާއަކީ 1988 ގައި އެތައް ހާސް ސިޔާސީ ގައިދީން ޝަރީޢަތްކޮށް މަރުގެ ޙުކުމް ތަންފީޒުކުރުމުގައި އިސްކޮށް ހަރަކާތްތެރިވި "ޑެތް ކޮމިޝަން" އޭ ކިޔުނު މަޝްހޫރު ކޮމިޓީގައި ހިމެނުނު ފަނޑިޔާރެއް ކަމަށް ތުހުމަތުކުރެވެއެވެ.
