ރައްޔިތުންނަށް ބޭސް ލިބުމުގައި ދަތިތަކާ ކުރިމަތިވާނަމަ އެކަން ރިޕޯޓުކުރުމަށް އާސަންދައިން އިރުޝާދު ދީފއެވެ. މިގޮތުން، ބޭސްފިހާރައަކުން އަމިއްލަ އަތުން ފައިސާ ދައްކަން މަޖުބޫރުވާ ހާލަތުގައި ނުވަތަ އާސަންދައިގެ ދަށުން ބޭސް ނުލިބޭ ހާލަތުގައި ވައިބަރ މެދުވެރިކޮށް 7591400 ނަންބަރަށް ޝަކުވާ ހުށަހެޅުމަށް އަންގާފައިވެއެވެ. ޝަކުވާ ހުށަހަޅާއިރު ބޭހުގެ ނަމާއި، ބޭސް ސިޓީ އަދި ރަސީދު ހުށަހެޅުމަށްވެސް އާސަންދައިން ވަނީ އެދިފައެވެ.
ސަރުކާރުން އާސަންދަ ނިޒާމު ހަރުދަނާކުރުމުގެ މަސައްކަތުގެ ތެރެއިން، 250 ބާވަތެއްގެ ބޭހަށް އާސަންދައިން ދޫކުރާ އަގަށް ބަދަލު ގެނެސްފައިވެއެވެ. މިކަމުގެ ސަބަބުން ބައެއް ބޭސްތައް އާސަންދައިގެ ތެރެއިން ލިބުން ހުއްޓި، އެކަމާމެދު ރައްޔިތުންގެ ކަންބޮޑުވުން ވަނީ އިތުރުވެފައެވެ. މި ބަދަލުތައް ގެނައުމަށް ނިންމާފައިވަނީ، ކޮންމެ އަހަރަކުވެސް އާސަންދައަށް މަޖިލީހުން ފާސްކުރާ ބަޖެޓަށްވުރެ އިތުރަށް ޚަރަދުކުރަން ޖެހުމުގެ ސަބަބުން އެ ނިޒާމު ދައުލަތަށް ބުރަޔަކަށް ވެފައިވާތީއެވެ.
