މިދިޔަ ނޮވެމްބަރު މަހު މަރުވި ނޭޕާލް އަންހެން ކުއްޖާ، ކަންޗަން ދުންގެލްގެ ހަށިގަނޑު އަދިވެސް ބަހައްޓާފައި އޮތީ މޯޗަރީގައި ކަމަށާއި، މައްސަލައިގެ ތަހުގީގު މިހާރުވެސް ކުރިއަށްދާ ކަމަށް ފުލުހުން ބުނެފިއެވެ.
ފުލުހުންގެ ފަރާތުން މައުލޫމާތު ދެމުން ބުނެފައިވަނީ، މިދިޔަ މަހުގެ 9 ވަނަ ދުވަހުގެ ހެނދުނު ވަގުތެއްގައި އުމުރުން 25 އަހަރުގެ ކަންޗަން ދުންގެލް ނިޔާވި މައްސަލަ އައިޖީއެމްއެޗްގެ އެމަޖެންސީ ރޫމުން ފުލުހުންނަށް ރިޕޯޓުކުރި ކަމަށެވެ. ތަހުގީގުން އެނގިފައިވާ ގޮތުގައި ކަންޗަން ހޮސްޕިޓަލަށް ގެނެސްފައިވަނީ ބަނޑުގައި ވަރަށް ބޮޑަށް ރިއްސަން ފެށުމާ ގުޅިގެންނެވެ. އަދި ހޮސްޕިޓަލަށް ގެންދިޔަ މަގުމަތީގައި އޭނާގެ ހަބަރު ހުސްވެފައިވާކަން ތަހުގީގަށް ފާހަގަކުރެވިފައިވާ ކަމަށް ފުލުހުން ބުނެފައިވެއެވެ.
ފުލުހުންގެ ފަރާތުން އިތުރަށް މައުލޫމާތު ދިން ގޮތުގައި، މެޑިކަލް ލީގަލް ރިޕޯޓުގައި ކަންޗަން ދުންގެލް ނިޔާވި ސަބަބު އަދި "ނޭނގޭ" ކަމަށް ބަޔާންކޮށްފައިވާ އިރު، އޭނާއަށް އެއްވެސް ބާވަތެއްގެ ޖިންސީ އަނިޔާއެއް ލިބިފައިވާކަން ރިޕޯޓުން ފާހަގަކޮށްފައެއް ނުވެއެވެ.
ކަންޗަން ދުންގެލްއަކީ އެނީމިއާގެ މެޑިކަލް ހިސްޓްރީއެއް އޮތް މީހެއްކަން ފާހަގަކޮށްފައިވާއިރު، އޭނާގެ ސްޕޮންސަރ ހަށިގަނޑާ ހަވާލުވެފައި ނުވާތީ، ފުލުހުންގެ ބެލުމުގެ ދަށުން ހަށިގަނޑު ވަނީ މޯޗަރީއަށް ގެންގޮސްފައެވެ. މި މައްސަލައިގެ ތަހުގީގު މިހާރުވެސް ކުރިއަށްދާ ކަމަށް ފުލުހުން ބުނެފައިވެއެވެ.
