ހުޅުމާލޭގެ މުނިސިޕަލް ޚިދުމަތްތައް މާލޭ ސިޓީ ކައުންސިލްގެ ބެލުމުގެ ދަށަށް ބަދަލުކުރުމަށް ބޭނުންވާ އެންމެހައި ކަންކަން ފަހިކޮށްދިނުމުގެ ޔަޤީންކަން އެޗްޑީސީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު ދެއްވައިފިއެވެ.
ނޫސްވެރިންނަށް މަޢުލޫމާތު ދެއްވަމުން ފަޒުލް ވިދާޅުވި ގޮތުގައި، އެޗްޑީސީން މާލޭ ސިޓީ ކައުންސިލާ ހަވާލުކުރަނީ ހަމައެކަނި މުނިސިޕަލް ޚިދުމަތްތަކާ ގުޅުންހުރި ކަންކަން އެކަންޏެވެ. މި މަސައްކަތް ކުރިއަށް ގެންދިއުމަށްޓަކައި މިހާރުވަނީ އެމްއޯޔޫއެއްގައި ސޮއިކުރެވި، އަދި ގައިޑްލައިންތަކެއް އެކުލަވާލެވި، އެކަމުގެ މަސައްކަތްތައް ފެށިފައެވެ.
ފަޒުލް އިތުރަށް ފާހަގަކުރެއްވި ގޮތުގައި، މުނިސިޕަލް ޚިދުމަތްތައް ރައްޔިތުންނާ ހަމައަށް ފޯރުކޮށްދިނުމަށް ނުވަތަ މާލޭ ސިޓީ ކައުންސިލްގެ ޤާނޫނީ އިމުގެ ތެރެއިން ކުރަންޖެހޭ އެއްވެސް ކަމަކަށް އެޗްޑީސީން އެއްވެސް އިރެއްގައި ހުރަހެއް ނާޅައެވެ. އެހެންނަމަވެސް، މި ޚިދުމަތްތައް ވިޔަފާރީގެ ހަމަތަކުގެ މަތިން ދެމެހެއްޓެނިވި ގޮތެއްގައި ކުރިއަށް ގެންދިއުމަކީ ކައުންސިލަށް ކުރިމަތިވެފައިވާ މައިގަނޑު ގޮންޖެހުމެއް ކަމުގައި އޭނާ ފާހަގަކުރެއްވިއެވެ.
މާލޭ ސިޓީ ކައުންސިލްގެ ޑެޕިއުޓީ މޭޔަރ އަޙްމަދު ނަރީޝް ވިދާޅުވި ގޮތުގައި، މި ޚިދުމަތްތައް ހަވާލުވުމުގައި ކައުންސިލަށް ދިމާވާ އެންމެ ބޮޑު ގޮންޖެހުމަކީ މާލީ ދަތިތަކެވެ. ކައުންސިލްގެ އަމާޒަކީ އެޗްޑީސީން މިހާރު ދެމުންދާ ފެންވަރަށްވުރެ ރަނގަޅު ފެންވަރެއްގައި މި ޚިދުމަތްތައް ފޯރުކޮށްދިނުން ކަމަށާއި، މިކަމަށް ބޭނުންވާ ދާއިމީ ފަންޑިންގ ހޯދުމަކީ މިވަގުތު ކުރިމަތިވެފައިވާ އެންމެ ބޮޑު ކަންބޮޑުވުން ކަމުގައި ނަރީޝް ފާހަގަކުރެއްވިއެވެ.
ފާހަގަކޮށްލެވޭ ގޮތުގައި، ހުޅުމާލޭގެ މުނިސިޕަލް ޚިދުމަތްތައް މާލޭ ސިޓީ ކައުންސިލްގެ ދަށަށް ބަދަލުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ. މި ވަޢުދު ފުއްދުމުގެ ގޮތުން، މިއަހަރުގެ ޖަނަވަރީ މަހު މިކަމާ ގުޅޭ އެއްބަސްވުމުގައި ވަނީ ސޮއިކުރެވިފައެވެ.
