ހުޅުމާލެ ދެވަނަ ފިޔަވަހީގެ ބީޗް ފްރަންޓާއި ބީޗް ސައިޑުން އިތުރު 18 ބިމެއް ވިއްކަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުވާލައިފިއެވެ.

ބީޗު ޕްރަންޓުން ވިއްކަނީ 1،454 އަކަފޫޓުގެ ބިމަކާއި 1،261 އަކަފޫޓުގެ ބިމެކެވެ. އަދި ބީޗް ސައިޑުން ވިއްކަނީ 1،316 އަކަފޫޓާއި 1،584 އަކަފޫޓާ ދެމެދުގެ 16 ބިމެވެ.

ބީޗް ފްރަންޓުން ވިއްކަނީ އަކަފޫޓެއް 4،500ރ. އަށެވެ. އެހެންވެ، 1،261 އަކަފޫޓުގެ ބިމުގެ އަގު 5.7 މިލިއަން ރުފިޔާ އަށް އަރާއިރު، ބީޗް ފްރަންޓުން ހުޅުވާލި 1،454 އަކަފޫޓުގެ ބިމުގެ އަގު 6.5 މިލިއަން ރުފިޔާއަށް އަރައެވެ. ހުޅުމާލެ 2 ގެ ބީޗް ސައިޑުން ބިން ވިއްކާ އެންމެ ދަށް އަގަކީ އަކަފޫޓެއް 4،000ރ. އެވެ. އެހެންވެ، އަލަށް ހުޅުވާލީ 16 ބިންތަކުގެ އަގު އުޅެނީ 5.3 މިލިއަން ރުފިޔާ އާއި 6.3 މިލިއަން ރުފިޔާއާ ދެމެދުގެ އަގުތަކެއްގައެވެ.

މިދިޔަ ސެޕްޓެމްބަރު މަހު އެޗްޑީސީން ވަނީ ބިންތަކެއް ވިއްކަން ހުޅުވާލައިފައެވެ. އެ ފަހަރު ބީޗް ފްރަންޓާއި ބީޗް ސައިޑުން ވިއްކަން ހުޅުވާލި ބިމުގެ ސައިޒު ހުރީ 1،000 އަކަފޫޓާއި 3،400 އަކަފޫޓާ ދެމެދުގެ އަގެއްގައެވެ.

މި ބިންތައް ވިއްކަން އެޗްޑީސީން ހުޅުވާލީ ހަމައެކަނި ދިވެހިންނަށް ކުރިމަތިލެވޭ ގޮތަށެވެ.