މިދިޔަ ހަފްތާގައި ހެކްކުރެވުނު އަލީ ރަމީޒުގެ ޔޫޓިއުބް ޗެނަލް މިހާރު ރިކަވަރ ކުރެވިފައިވާ ކަމަށް އޭނާ ބުނެފިއެވެ.
އަލީ ރަމީޒު، މިދިޔަ ހޮނިހިރު ދުވަހު އޭނާގެ ޗެނަލް ހެކްކުރެވުނު ކަމަށް ބުނެ، އެކުވެރިންގެ އެހީއަށް އެދުނެވެ. ރޭގެ ވަގުތެއްގައި އޭނާ ހިއްސާކުރި މަޢުލޫމާތުގައި، ޗެނަލް އަނބުރާ ލިބިފައިވާކަމަށާއި، މި ކަމުގައި އެހީތެރިވެދެއްވި އެންމެހާ ފަރާތްތަކަށް ޝުކުރު އަދާކުރާ ކަމަށް ބުނެފައިވެއެވެ.
އައްޔަ ވަކިން ޚާއްޞަކޮށް އޭނާގެ ގާތް އެކުވެރިއެއް ކަމަށްވާ މާހިރުގެ ނަން ފާހަގަ ކޮށްފައެވެ. "ތިޔަ ކޮށްދެއްވީ ވަރަށް ބޮޑު މަސައްކަތެއް. މާތްﷲ ތިޔަ އެންމެހައި ބޭފުޅުންނަށް ހެޔޮ ޖަޒާ ދެއްވާށި. އާމީން"
އައްޔަ ލިޔެފައިވެއެވެ.
ކުރީގައި ރާއްޖޭގެ ލަވަކިޔުމުގެ ދާއިރާގައި އެންމެ އިސް ސަފުގައި ހުރުމަށްފަހު، މިހާރު އައްޔަ އެންމެ އަހައްމިއްޔަތުކަން ދެނީ އިސްލާމްދީނުގެ ދަޢުވަތު ފެތުރުމުގެ މަސައްކަތަށެވެ. މި މަސައްކަތުގައި އޭނާގެ ރަސްމީ ޔޫޓިއުބް ޗެނަލް މެދުވެރިކޮށް މުހިންމު މެސެޖުތަކާއި މަޢުލޫމާތު އާންމުންނާ ހަމައަށް ފޯރުކޮށްދެމުން ގެންދެއެވެ.
ޔޫޓިއުބުގެ އިތުރުން އެހެނިހެން ސޯޝަލް މީޑިއާ ޕްލެޓްފޯމުތަކުގައިވެސް އައްޔަ ދީނީ ދަޢުވަތުގެ މަސައްކަތް ކުރިއަށް ގެންދެއެވެ.
އަދި ޓީވީ ޕްރޮގްރާމްތައް ހުށަހެޅުމުގައިވެސް އޭނާ ދަނީ ހަރަކާތްތެރިވަމުންނެވެ. މިގޮތުން އޭނާގެ މައިގަނޑު އަމާޒަކީ އިސްލާމްދީނުގެ މެސެޖު ވީހާވެސް ގިނަ ބަޔަކާ ހަމައަށް ފޯރުކޮށްދިނުމެވެ.
