ކުރީގެ މަޝްހޫރު ލަވަކިޔުންތެރިޔާ އަދި މިހާރު ފުޅާ ދައިރާއެއްގައި ދީނީ މައުލޫތޫ ފެތުރުމަށް މަސައްކަތް ކުރަމުންދާ އަލީ ރަމީޒުގެ ޔޫޓިއުބް ޗެނަލް ހެކްކޮށްފައިވާ ކަމަށް އޭނާ ބުނެފިއެވެ.
އަލީ ރަމީޒަކީ ސޯޝަލް މީޑިއާގެ އެކި ޕްލެޓްފޯމްތައް މެދުވެރިކޮށް ދީނީ އިލްމުގެ އިތުރުން ދީނީ އެކި މައުލޫމާތުވެސް ދީނީ އިލްމުވެރިން މެދުވެރިކޮށް ފެތުރުމުގައި މަސައްކަތް ކުރަމުން އަންނަ ފަރާތެކެވެ. އެގޮތުން މިހާރު އޭނާގެ އެންމެ މުހިންމު މަސައްކަތަކީ އިސްލާމްދީނުގެ ދަޢުވަތު ފެތުރުމެވެ.
މި މަސައްކަތުގައި، އޭނާގެ ރަސްމީ ޔޫޓިއުބް ޗެނަލް މެދުވެރިކޮށް މުހިންމު މެސެޖުތަކާއި މަޢުލޫމާތުތައް އާންމުންނާ ހިއްސާކުރަމުން ދަނިކޮށް، އޭނާގެ ޗެނަލް ހެކްކޮށްފައިވާ ކަމަށް ރޭ އޭނާ ބުނެފައިވެއެވެ.
މިކަމާ ގުޅިގެން، އަލީ ރަމީޒްވަނީ އޭނާގެ ޗެނަލާއި އީމެއިލް އަނބުރާ ހޯދުމަށް އެހީތެރިކަމަށް އެދިފައިވެއެވެ. ޔޫޓިއުބްގެ އިތުރުން، އެހެނިހެން ސޯޝަލް މީޑިއާ ޕްލެޓްފޯމުތަކުގައިވެސް އައްޔަ ދަނީ ދީނީ ދަޢުވަތުގެ މަސައްކަތް ކުރިއަށް ގެންދަމުންނެވެ. އަދި ދީނީ ޓީވީ ޕްރޮގްރާމްތައް ހުށަހެޅުމުގައިވެސް އަވަދިނެތި މަސައްކަތްކުރަމުންދާކަން ފާހަގަކުރެވެއެވެ.
