ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލޭގައި ތަރައްޤީކުރަމުންދާ އިސްރަށްވެހިންގެ މަރުކަޒުގެ އިންޓީރިއަރ ޑިޒައިންކުރުމުގެ ފުރުޞަތު ވިލާ ކޮލެޖުގެ ދަރިވަރުންނަށް ދީފިއެވެ. މިކަން ހާމަކުރެއްވީ އެޗްޑީސީގެ މެނޭޖިންގ ޑިރެކްޓަރ އިބްރާހިމް ފަޒުލް ރަޝީދެވެ.
ވިލާ ކޮލެޖުގެ ފުރަތަމަ އިންޓީރިއަރ އާކިޓެކްޗަރ މައުރަޒު ޝަރަފުވެރިކޮށްދެއްވަމުން ފަޒުލް ވިދާޅުވީ، މި މަޝްރޫޢުގެ އިންޓީރިއަރ އާކިޓެކްޗަރގެ މަރުޙަލާއަށް ދިޔުމުން، ވިލާ ކޮލެޖުގެ ދަރިވަރުންނަށް ޢަމަލީގޮތުން ބައިވެރިވުމުގެ ފުރުޞަތު ދޭނެ ކަމަށެވެ. "މި އިމާރާތުގައި ތިޔަ ކުދިންގެ އެހީގައި އެތަން ޑިޒައިންކުރުމުގެ ފުރުޞަތު އެޗްޑީސީގެ ފަރާތުން ހަދިޔާކުރަން," ފަޒުލް ވިދާޅުވިއެވެ.
ވިލާ ކޮލެޖުން އިންތިޒާމުކުރި އިންޓީރިއަރ ޑިޒައިން މައުރަޒުގައި، އެ ކޮލެޖުގެ ފެކަލްޓީ އޮފް އިންޖިނިއަރިންގ އެންޑް ޓެކްނޮލޮޖީން ހިންގާ އިންޓީރިއަރ އާކިޓެކްޗަރ ޑިގްރީ ޕްރޮގްރާމުގެ ދަރިވަރުންގެ 30 ޕްރޮޖެކްޓް ދައްކާލާފައިވެއެވެ. މީގެ ތެރޭގައި ކޮލެޖުގެ ފުރަތަމަ އަހަރު ނިންމި ދަރިވަރުންނާއި މިހާރު ކިޔަވަމުންދާ ދަރިވަރުންގެ ހުށަހެޅުންތައް ހިމެނެއެވެ.
