އެމެރިކާގެ ކުރިޔަށް އޮތް ރިޔާސީ އިންތިޚާބުގައި ޑިމޮކްރެޓިކް ޕާޓީގެ ފަރާތުން ވާދަކުރެއްވުމަށް، އެޕާޓީގެ ރިޔާސީ ޓިކެޓް ރަސްމީކޮށް ކާމަލާ ހެރިސްއަށް އަރުވައިފިއެވެ. އަދި މިހާރު ކުރިޔަށްދާ ޑިމޮކްރެޓިކް ޕާޓީގެ ކޮންވެންޝަންގައި ހެރިސްވަނީ ރަސްމީކޮށް ޓިކެޓް ގަބޫލުކުރެއްވިކަން އިއުލާން ކުރައްވާފައެވެ.

ބުރާސްފަތި ދުވަހުގެ ރޭ ޑިމޮކްރެޓިކް ޕާޓީގެ ރިޔާސީ ކެންޑިޑޭޓްކަން ރަސްމީކޮށް އިއުލާން ކުރެވުމާއެކު، ނައިބު ރައީސް ކަމަލާ ހެރިސް ވަނީ އެމެރިކާގެ ހުރިހާ ރައްޔިތުންނަށް "އާ ކުރިމަގެއް" ދައްކަވާދެއްވާނެކަމުގެ ވަޢުދު ވެވަޑައިގެންފައެވެ. އެކަމަނާ ދެއްވި ވާހަކަފުޅުގައި އެއްބައިވަންތަވުމަށް ގޮވާލައްވާ، ވޯޓު ދޭ ފަރާތްތަކުން ޑޮނަލްޑް ޓްރަމްޕް ބަލައިނުގަތުމަށް އިލްތިމާސް ކުރެއްވިއެވެ.

ޝިކާގޯގައި ބޭއްވުނު އެ ޕާޓީގެ ކޮންވެންޝަން ނިންމަވާލައްވަމުން ކާމަލާ ހެރިސް ވިދާޅުވީ، ނޮވެމްބަރުގެ އިންތިޚާބަކީ "މާޒީގެ ހިތްދަތިކަމާއި، ބައިބައިވުމުގެ ހަނގުރާމަތަކުން އަރައިގަތުމުގެ" ފުރުޞަތެއް ކަމުގައެވެ. އެކަމަނާގެ މި ވާހަކަފުޅާއެކު، ތާއީދުކުރައްވާ ފަރާތްތަކުން އަޑުގަދަކޮށް އަތްޖަހަމުން ދަނިކޮށް، 100،000 ފުއްޕާހަން ހެރިސް ވާހަކަ ދައްކަން ހުންނެވި ޕޯޑިއަމާ ދިމާލުން މަތިން ދިޔައީ ފައިބަމުންނެވެ.

ހެރިސްގެ ވާހަކަފުޅަކީ، އެކަމަނާގެ މިހާތަނަށް ސާފުނުވާ ސިޔާސަތުތަކުގެ އަސާސްތައް ބަޔާންކުރުމަށް ފަރުމާކުރެވިފައިވާ ހަތަރު ދުވަހުގެ މުހިއްމު ހަރަކާތުގެ ނިންމުމެވެ.

އެމެރިކާގެ ބޮޑު ޕާޓީއެއްގެ ރިޔާސީ ޓިކެޓުގައި އެންމެ ފުރަތަމަ އަންހެން، އަދި އޭޝިއަން-އެމެރިކަން ކަނބަލެއްގެ ގޮތުގައި އެެމެރިކާގެ ރިޔާސީ އިންތިޚާބެއްގައި ވާދަ ކުރައްވާ ކެނޑިޑޭޓެއްގެ ގޮތުގައި ކާމަލާ ހެރިސްވަނީ ތާރީޚުގެ ތެރެއަށް ވަދެފައެވެ.