ރާއްޖޭގައި އަލަށް ފަށާ ބަންކަރިންގ ޚިދުމަތް ފަށާނީ އޯފްޝޯ ބަންކަރިންގގެ ގޮތުގައި ކަމަށް އެސްޓީއޯގެ މެނޭޖިންގ ޑިރެކްޓަރު ޝިމާދު އިބްރާހީމް ވިދާޅުވެއްޖެއެވެ.
އިޤްތިޞާދީ ވަޒީރު މުޙައްމަދު ސަޢީދު މީގެ ކުރިން ވިދާޅުވެފައިވާ ގޮތުގައި އިހަވަންދިއްޕޮޅުގައި ބައިނަލްއަޤްވާމީ ބަންކަރިންގ މަޝްރޫޢު މި މަހުގެ 20 ވަނަ ދުވަހު ފެށޭނެއެވެ.
އެސްޓީއޯއިން މި އަހަރުގެ މާރިޗު މަހު ވަނީ ދުނިޔޭގެ އެންމެ ބޮޑު އަމިއްލަ ހަކަތައިގެ ވިޔަފާރި ކުންފުނި، ވިޓޯލްއާއެކު މި މަޝްރޫޢާ ގުޅޭ ޓާމް ޝީޓެއްގައި ސޮއިކޮށްފައެވެ.
ޝިމާދު އިބްރާހީމް ވިދާޅުވި ގޮތުގައި، އެއްގަމުގައި ޚިދުމަތް ފެށުމަށް އިތުރު ވަގުތު ހޭދަވާނެތީ، ފުރަތަމަ ފަށާނީ އޯފްޝޯ ބަންކަރިންގ ޚިދުމަތުގެ ގޮތުގައެވެ. މި ގޮތުން ދެ ފްލޯޓަރ ބޯޓު ރާއްޖެ ގެނެސްގެން މަސައްކަތް ފަށާނެ ކަމަށް އޭނާ ވިދާޅުވިއެވެ.
" އަޅުގަނޑުމެން ފަށައިގަންނަން މި ގަސްތުކުރަނީ ދެ ބޯޓެެއް އެއީ ދެ ފްލޯޓާއެއް ރާއްޖެ ގެނެސްފައި އޮފް ޝޯ ބަންކަރިންގެ ހިދުމަތުގެ ގޮތުގައި، އެއީ ލޭންޑްގައި މަސައްކަތް ފެށުމުގައި ބަދަލުގައި ފްލޯޓާސްތައް ބަހައްޓައިގެން މަސައްކަތް ފެށުމަށްްޓަކައި.
މި ޚިދުމަތުގައި ދެ ބާވަތެއްގެ ތެޔޮ ވިއްކާނެ ކަމަށް ޝިމާދު ވިދާޅުވިއެވެ. އެއީ އެމްޖީއޯ (މެރިން ގޭސް އޮއިލް) އާއި ވީއެލްއެސްއެފްއޯ (ފިއުލް އޮއިލް) އެވެ. އަދި ޚިދުމަތް މާކެޓްކުރުމުގައި ވިޓޯލްގެ ދައުރު މުހިންމުވާނެ ކަމަށްވެސް އޭނާ ފާހަގަކުރެއްވިއެވެ.
ކޮންމެ ބޯޓެއްގެ ޖާގައަކީ ގާތްގަނޑަކަށް 4000 ޓަނު ކަމަށް ޝިމާދު ވިދާޅުވިއެވެ. އަދި ކުރިމަގުގައި ބިން ހިއްކައި، ތާނގީ ބަހައްޓައިގެން ބަންކަރިންގ ޚިދުމަތް ދިނުމަކީ ކުންފުނީގެ އަމާޒެއް ކަމުގައިވެސް އޭނާ ވިދާޅުވިއެވެ.
އިޤްތިޞާދީ ވަޒީރު ސަޢީދު ވިދާޅުވެފައިވާ ގޮތުގައި، ރާއްޖޭގެ އުތުރުން 300 އާއި 450 އާ ދެމެދުގެ އަދަދަކަށް ވިޔަފާރި ބޯޓުފަހަރު ދަތުރުކުރެއެވެ. އޭގެ ތެރެއިން އެންމެ 1 އިންސައްތަ ބޯޓުފަހަރަށް ބަންކަރިންގ ޚިދުމަތް ދިން ކަމުގައިވިޔަސް، ފުރަތަމަ އަހަރު ރާއްޖެއަށް 400 މިލިއަން ޑޮލަރު ވަންނާނެއެވެ.
