ހުޅުމާލޭގައި ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) އިން އަޅަމުން ގެންދާ ހޮޓާ ދޫކޮށްލުމަށް ނިންމާފައިވާކަމަށް އެ ކުންފުނީގެ މެނޭޖިން ޑިރެކްޓަރ ޝިމާދު އިބްރާހިމް ވިދާޅުވެއްޖެ އެވެ.
ހުޅުމާލޭގައި އެސްޓީއޯއިން އަޅަމުން ގެންދާ، ފަސްތަރީގެ ހޮޓަލާއި ގުޅޭގޮތުން އެކި ގޮތްގޮތަށް ވާހަކަ ދެކެވި ކޮންމެ އޭޖީއެމްއެއްގައި ވެސް ހިއްސާދާރުން އެ މަސައްކަތް ކުރިޔަށްދާ ގޮތާއި ގުޅޭގޮތުން ސުވާލު ކުރެ އެވެ
އެސްޓީއޯގެ އަހަރީ އާންމު ޖަލްސާގައި ރޭ ޝިމާދު ވިދާޅުވީ، ކުންފުނީގެ ކުރިމަގަށް ވިސްނައި ނުގުޅޭ ބައެއް މަސައްކަތްތައް ދޫކޮށް އައު އެސެޓުތަކަށް ފޯކަސް ކުރުން މުހިންމުކަމަށެވެ. އޭގެ ތެރޭގައި ޝިމާދު ފާހަގަކުރެއްވީ، މިފްކޯގައި އޮތް އެސްޓީއޯގެ ހިއްސާ ދޫކޮށްލުމެވެ.
ހުޅުމާލޭގެ ސިޓީ ހޮޓާ ދޫކޮށްލުމުގެ މަޝްވަރާތައް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ދެމެދު ފަށައި ޝިމާދު ވިދާޅުވީ މިއީ އެތައް މަޝްވަރާތަކަށް ފަހު ވެސް މީގެ ކުރިން ހައްލު ނުގެނެވި އޮތް މައްސަލައެއްކަމަށެވެ
މީގެކުރިން އެސްޓީއޯގެ އޭޖީއެމްތަކުގައި ހިއްސާދާރުން ވަނީ، ހުޅުމާލޭގެ ސިޓީ ހޮޓަލާއި މިފްކޯއަށް ލިބެމުންދާ ގެއްލުންތަކަށް ކަންބޮޑުވުންފާޅުކޮށްފަ އެވެ. އަދި އޭރު ވެސް ކުންފުނިން ވަނީ ހޮޓެލްއަށް ކޮންޓްރެކްޓެއް އޮތް ނަމަވެސް އެއްބަސްވުން އުވާލުމުގެ މަރުހަލާ ކުރިޔަށް ގެންދާކަމަށް ހާމަކޮށްފަ އެވެ.
އެ ނިންމުން އެންމެ ފުރަތަމަ ކުންފުނިން އިއުލާނު ކުރީ 2020 ވަނަ އަހަރު ބޭއްވި، އޭޖީއެމް ބައްދަލުވުމުގަ އެވެ. އަދި އޭގެ ޖެހިގެން އައި އަހަރު ހޮޓާ ހިންގުމަށް އިތުރު ބަޔަކު ޝައުގުވެރިވޭތޯ ބެލުމަށް ހުޅުވާލި އެވެ. އެކަމަކު އެއާއި އެއްގޮތަށް އެއްވެސް ހުށަހެޅުމެއް ލިބުނުކަން ނުވަތަ ނޫންކަން ސާފެއް ނޫނެވެ.
މި ހޮޓަލަކީ އެސްޓީއޯއިން 2011 ވަނަ އަހަރުގެ ތެރޭގައި، ރެޑިސަން ބްލޫ ހޮޓެލްސްއާ ގުޅިގެން ތަރައްގީކުރަން ފެށި ހޮޓަލެކެވެ. އަދި އެ އިމާރާތުގެ އޮނިގަނޑާއި ކޮންކްރީޓް މަސައްކަތްތައް އެއްކޮށްހެން ނިމިފައިވާއިރު، މި ހޮޓާ ވިއްކާލަން އެސްޓީއޯއިން މަސައްކަތްކުރާތާ އަހަރުތަކެއް ވެއްޖެއެވެ.
މި ހޮޓަލުގެ މަސައްކަތް އެސްޓީއޯއިން ހުއްޓާލީ 2014 ވަނަ އަހަރުއެވެ. އަދި އެފަހުން މި ހޯޓާ ވިއްކާލަން އެތައް ފަހަރެއްގެ މަތިން އެސްޓީއޯއިން ކުރި މަސައްކަތް ވަނީ ނާކާމިޔާބުވެފައެވެ.
