ކަލަކު ވޮޑިގެންވާކަން ގަބޫލު ނުކުރުމުގެ ނުރައްކާތެރި ފިކުރު މުސްލިމުންގެ ތެރޭގައި ފެތުރެމުންދާކަމުގައި މިއަދުގެ ހުކުުރު ޚުޡުބާގައި ވިދާޅުވެއްޖެއެވެ.
"އިސްލާމް ދީނަކީ މެދުމިނުގެ ދީނެވެ." މިމައުޟޫއަށް ޚާއްސަ ކުރެވިގެންދިޔަ ހުކުރު ޚުޡުބާގައި ވިދާޅުވީ އިސްލާމްދީނަކީ މެދުމިނުގެ ދީނަކަށް ވާއިރު، އެ ދީނާ ދުރު ބައެއް ފިކުރު، ދިވެހީންގެ ތެރޭގައިވެސް ފެތުރެން ފަށާފައިވާކަމުގައެވެ. އޭގެ ތެރޭގައި ދީނީ ގޮތުން ހައްދު ފަހަނައަޅައިދިއުން ފަދަ ކަންކަން ހިމެނޭ ކަމުގައިވެސް މިއަދުގެ ޚުޡުބާގައި ވިދާޅުވެފައި ވެއެވެ.
މުސްލިމް އަޚުންނޭވެ! މުސްލިމުންގެ ތެރޭގައި ފެތުރެމުންދާ ނުރައްކާތެރި އެއް ފިކުރަކީ، ކަލަކު ވޮޑިގެންވާކަން ގަބޫލު ނުކުރުމުގެ ފިކުރެވެ. އޭގެ ނަތީޖާއެއްގެ ގޮތުން އެ ފިކުރުގެ އަހުލުވެރިންނާއި މުސްލިމުންނާ ދެމެދު އޮންނަ ޝަރުޢީ ގުޅުންތައް ކެނޑޭނެއެވެ. ކާވަނީގެ ގުޅުމާއި، ވާރުތަވުންފަދަ ހުރިހައި ގުޅުންތައް ކެނޑޭނެއެވެ. އޭގެ އިތުރަށް އެމީހުން އެ ގޮތުގައި މަރުވެއްޖެނަމަ، ތިނބޭނީ ނަރަކައިގައެވެ.
މިއަދުގެ ޚުޡުބާގައި ވިދާޅުވެފައި ވެއެވެ.
ޚުޡުބާގައި ވިދާޅުވި ގޮތުގައި މިއަދު ފެތުރެމުންދާ އަނެއް ފިކުރަކީ ދީނުގައި ހަރުކަށި ވުމުގެ ފިކުރު ކަމުގައެވެ. އެގޮތުން، ދީނުގައި އޮތް މެދުމިން ދޫކޮށް، ހަރުކަށިވެ، ހައްދުފަހަނައަޅައި ދިއުމަކީ، ރަސޫލާ މިއުންމަތަށް މަނާ ކުރައްވާފައިވާކަމެއް ކަމުގައި ޚުޡުބާގައި ވިދާޅުވެފައި ވެއެވެ. އަދި އޭގެ ސަބަބުން މުސްލިމުން ހަލާކުވެދާނެކަމުގެ އިންޒާރު ރަސޫލާ މިއުންމަތަށް ދެއްވާފައިވާކަމުގައިވެސް ޚުޡުބާގައި ވިދާޅުވެފައި ވެއެވެ.
