ރައްޔިތުންގެ މަޖިލީހުގެ މެޖޯރިޓީ ލީޑަރަކަށް ޕީއެންސީގެ ޕާލަމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހް އަދި މައިނޯރިޓީ ލީޑަރަކަށް އެމްޑީޕީގެ ޕާލަމެންޓްރީ ގްރޫޕްގެ ލީޑަރު، ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ކަނޑައަޅައިފިއެވެ.

މަޖިލިހުގެ މެޖޯރިޓީ ލީޑަރާއި މައިނޯރިޓީ ލީޑަރު އިއުލާނު ކުރެއްވީ މިއަދު ބޭއްވި މަޖިލީހުގެ ޖަލްސާގައި، މަޖިލިހުގެ ރައީސް އަބްދުއްރަހީމް އަބްދުﷲ އެވެ.

މަޖިލިހުގެ ގަވައިދުގައިވާ ގޮތުން މެޖޯރިޓީ ލީޑަރަކާއި މައިނޯރިޓީ ލީޑަރަކު ހުންނަން ޖެހެއެވެ. މަޖިލިހުގެ މެޖޯރިޓީ ލީޑަރަކީ މަޖިލިހުގައި އެންމެ ގިނަ ގޮނޑި ކޮންޓްރޯލް ކުރާ ޕާޓީގެ މެމްބަރެވެ. އަދި މައިނޯރިޓީ ލީޑަރަކީ ދެވަނަ އަށް އެންމެ ގިނަ ގޮނޑި ކޮންޓްރޯލް ކުރާ ޕާޓީގެ މެމްބަރެކެވެ.

ވިހި ވަނަ މަޖިލިހުގައި 75 ގޮނޑިއާ އެކުގައި ސުޕަ މެޖޯރިޓީ ލިބިފައި ވަނީ ވެރިކަން ކުރާ ޕީއެންސީއަށެވެ. ދެވަނަ އަށް އެންމެ ގިނަ ގޮނޑި ކޮންޓްރޯލް ކުރާ އެމްޑީޕީގައި 12 މެމްބަރުން ތިއްބަވައެވެ. ދެން ތިއްބަވަނީ އެމްޑީއޭގެ ދެ މެމްބަރަކާއި ޖުމްހޫރީ ޕާޓީގެ މެމްބަރަކާއި އެމްއެންޕީގެ މެމްބަރަކާއި މިނިވަން ދެ މެމްބަރުންނެވެ.