ކޮލަމްބިއާގެ ހުޅަނގަށް އައި 7.4 މެގްނިޓިއުޑްގެ ބިންހެލުމުގައި މަރުވި މީހުންގެ އަދަދު 111 އަށް އަރައި، ގައުމީ ކުއްލި ނުރައްކަލުގެ ހާލަތު އިއުލާނުކޮށްފިއެވެ.
ޔޫއެސް ޖިއޮލޮޖިކަލް ސާވޭއިން ބުނިގޮތުގައި، ބިމުގެ 107 ކިލޯމީޓަރު އަޑިން އައި މި ބިންހެލުމަކީ 21 ވަނަ ގަރުނުގައި ކޮލަމްބިއާއަށް ކުރިމަތިވި އެންމެ ބާރުގަދަ ބިންހެލުން ކަމަށް އެ ގައުމުގެ ޖިއޮލޮޖިކަލް ސާވިސްއިން ވަނީ ފާހަގަކޮށްފައެވެ. ހާދިސާއާ ގުޅިގެން ރައީސް އަބެލާޑޯ ޑިލާ އެސްޕްރިއެއްޔާ ވަގުތުން ކުއްލި ނުރައްކަލުގެ ހާލަތު އިއުލާނުކުރެއްވި އިރު، ވެއްޓިފައިވާ އިމާރާތްތަކުގެ ދަށުގައި ތާށިވެފައި ތިބި މީހުން ސަލާމަތްކުރުމުގެ މަސައްކަތް ރެސްކިއު ޓީމުތަކުން ދަނީ ހުއްޓުމެއްނެތި ކުރަމުންނެވެ.
ބިންހެލުމުގައި އެންމެ ބޮޑަށް ގެއްލުން ލިބިފައިވަނީ ރިސަރަލްޑާ ސަރަހައްދާއި އޭގެ ވެރިރަށް ޕެރޭރާއަށެވެ. އަދި ބިންހެލުމުގެ މަރުކަޒާ އެންމެ ކައިރީގައި އޮތް ޗޮކޯ ސަރަހައްދުގެ މުއާސަލާތީ ހިދުމަތްތައް ކެނޑިފައި ވުމުން، އެ ސަރަހައްދަށް ލިބިފައިވާ ގެއްލުން މުޅިން ދެނެގަތުމަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ. މި ގެއްލުންތައް އިންޖިނިއަރުންގެ ޓީމުތަކުން ބަލައި ދިރާސާ ކުރުމަށްޓަކައި، ހުޅަނގު ކޮލަމްބިއާގެ މައި މަގުތަކާއި އެއާޕޯޓުތަކުގެ އޮޕަރޭޝަންތައް ވެސް ވަނީ ވަގުތީ ގޮތުން މެދުކަނޑާލާފައެވެ.
މީގެ އިތުރުން، މައި ބިންހެލުމަށްފަހު މިހާތަނަށް 21 އަށްވުރެ ގިނަ އާފްޓަޝޮކް ރެކޯޑުކުރެވިފައިވާއިރު، ކުރިއަށް އޮތް ދުވަސްތަކުގައި ވެސް އިތުރު ލޮޅުންތައް އައުމުގެ ފުރުސަތު އޮތުމުން، އާންމުން ސަމާލުވުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ. ދުނިޔޭގެ "ރިންގް އޮފް ފަޔާ" ސަރަހައްދުގައި އޮންނަ ކޮލަމްބިއާއަށް ބިންހެލުންތައް ކުރިމަތިވުމަކީ އާންމު ކަމަކަށް ވިޔަސް، މި ފަހަރުގެ ބިންހެލުމުގައި ލިބިފައިވާ ގެއްލުންތައް ފާއިތުވި އެތައް އަހަރެއްގެ ތެރޭގައި ވެސް ދުށް ނުދެކޭހާ ބޮޑު ކަމަށް އެ ގައުމުގެ ކަމާބެހޭ ފަރާތްތަކުން ސިފަކުރެއެވެ.
ކޮމެންޓު ފޮނުވާ