މި މަހުގެ 21 ވަނަ ދުވަހު ބޭއްވި ރައްޔިތުންގެ މަޖިލިހުގެ އިންތިހާބުގައި ވާދަކުރެއްވި ކެންޑިޑޭޓުން ހުޅުމާލޭގައި ހަރުކުރި ބެނާތަކާއި ކެންވަސްތައް ނެގުމަށް ހައުސިން ޑިވެލޮޕްމަންޓް ކޯރަޕޭޝަން (އެޗްޑީސީ) އިން އަންގައިފިއެވެ.

އެޗްޑީސީން ނެރުނު ބަޔާނެއްގައި ބުނީ މަޖިލިހުގެ އިންތިހާބާ ގުޅިގެން އެ ކޯޕަރޭޝަނުން ހުރިހާ ކެންޑިޑޭޓުންނަށް ކެމްޕެއިން ކުރުމުގެ ހަމަހަމަ ފުރުސަތު ހޯދައި ދިނުމުގެ ގޮތުން ކެމްޕެއިން ބެނާ އާއި ކެންވަސް ޖެހުމަށް ހުޅުވާލި ފުރުސަތުގައި ގިނަ އަދަދެއްގެ ކެންޑިޑޭޓުން ހުޅުމާލޭގެ އެކި ސަރަހައްދުތަކުގައި ބެނާ އާއި ކެންވަސް ޖެހި ކަމަށެވެ.

ނަމަވެސް މަގުތަކުގައި ޖަހާ ކެންވަސް އާއި ބެނާތަކުގެ ސަބަބުން، މަގު ބޭނުން ކުރާ އާންމުންނަށް ދަތިތަކާ ކުރިމަތިވާ ކަމަށް އެޗްޑީސީން ބުންޏެވެ.

އެހެންކަމުން މަޖިލިސް އިންތިހާބުގެ ކެމްޕެއިންގެ ބޭނުމަށް ޖަހާފައިވާ ބެނާތަކާއި ކެންވަސްތައް މިއަދުން ފެށިގެން ކުރިއަށް އޮތް އެއް ހަފްތާ ތެރޭގައި ނެގުމަށް އެޗްޑީސީން އެދިފައިވެއެވެ.

އިންތިހާބުތަކާ ބެހޭ ގާނޫނުގައިވާ ގޮތުން އިންތިހާބެއް ނިމި 10 ދުވަސްތެރޭގައި ކެމްޕެއިނަސް ހަރުކުރި ޕޯސްޓަރުތަކާ، ދަމާ ބެނާތަކާއި އެހެނިހެން ތަކެތި ނަގަން ޖެހެއެވެ.