މިދިޔަ ހޮނިހިރު ދުވަހު އީރާނުން އިސްރާއީލަށް ދިން ހަމަލާގައި އެގައުމަށް 300 އަށް ވުރެ ގިނަ މިސައިލާއި ޑްރޯން ފޮނުވާލުމާ ގުޅިގެން އިރާން ހަމަލާއާއި ގުޅޭގޮތުން ގޮތެއް ނިންމުމަށް އިޒްރޭލުގެ ހަނގުރާމައިގެ ކެބިނެޓްގެ ބައްދަލުވުމެއް ހޯމަ ދުވަހު ބޭއްވުމަށްފަހު އިރާނަށް ބަދަލު ހިފުމުގެ ގޮތުން ހަމަލާ ދޭނެކަމުގެ އިންޒާރު އިސްރާއީލުން ދީފިއެވެ.
ނަމަވެސް، އިރާނާމެދު އަޅާނެ ފިޔަވަޅެއް އިސްރާއީލުން ހާމަކޮށްފައެއް ނުވެއެވެ. އީރާނާ ދެކޮޅަށް ބައިނަލްއަގްވާމީ މުޖުތަމައު އެއްބައިވަންތަވުމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ގޮވާލައްވާފައެވެ. އިރާނާއި އިރާގާއި ސީރިއާ އަދި ޔަމަނުން ފޮނުވާލި ޕްރޮޖެކްޓަލްތަކާއި އިޒްރޭލާއި އެމެރިކާ އާއި އިނގިރޭސިވިލާތާއި އުރުދުން އިން ވައްޓާލި ޕްރޮޖެކްޓަލްތަކާ އެކު ނުވަ ގައުމަކުން ވަނީ އަސްކަރީ ހަމަނުޖެހުންތަކުގައި ބައިވެރިވެފަ އެވެ.
އީރާނުން އެ މައްސަލަ ނިމުމަކަށް އައިސްފައިވާ ކަމަށް ދެކޭ ކަމުގެ އިޝާރާތެއް ދީފައިވާއިރު، އިސްރާއީލުގެ އަސްކަރިއްޔާގެ ޗީފް އޮފް ސްޓާފް ވިދާޅުވީ ހަމަލާއަށް ޖަވާބު ދޭނެކަމަށެވެ. ތެހެރާނުން ބުނީ މި ހަމަލާއަކީ އޭޕްރީލް މަހުގެ އެއްވަނަ ދުވަހު ސީރިއާގައި ހުންނަ އެގައުމުގެ ކޮންސިއުލޭޓަށް އިސްރާއީލުން ދިން ވައިގެ ހަމަލާގައި 13 މީހުން ޝަހީދުވި ހަމަލާގެ ބަދަލު ހިފުމުގެ ގޮތުން ދިން ހަމަލާއެއް ކަމަށެވެ.
އެމެރިކާގެ ރައީސް ޖޯ ބައިޑަން ވިދާޅުވީ އެމެރިކާއަކީ އިޒްރޭލުގެ ސަލާމަތަށް މަސައްކަތްކުރާ ގައުމެއް ކަމަށާއި މެދުއިރުމަތީގެ ހަމަނުޖެހުންތައް އިތުރަށް ހޫނުވިޔަ ނުދޭން ބޭނުންވާ ކަމަށެވެ. އިނގިރޭސިވިލާތުގެ ބޮޑުވަޒީރު ރިޝީ ސުނަކް ވަނީ ހުރިހާ ފަރާތްތަކަކުންވެސް "ކެތްތެރިކަން ދެއްކުމަށް" ގޮވާލައްވާފައެވެ.
ކޮމެންޓު ފޮނުވާ