އިރާނުން އިސްރާއީލަށް އަމާޒުކޮށް ކުރޫޒް މިސައިލުންނާއި ޑްރޯންއިން ދިން ހަމަލާތަކަށް ރައީސް މައުމޫން މަރުޙަބާ ވިދާޅުވެއްޖެއެވެ.
އީރާނުން ރޭވަނީ އިސްރާއިލަށް އަމާޒުކޮށް 300 އަށް ވުރެ ގިނަ ޑްރޯން އާއި މިސައިލް ފޮނުވާލާފައެވެ.
އިޒްރޭލުން އީރާނުން ފޮނުވާލި 300 އަށް ވުރެ ގިނަ ޑްރޯން އާއި މިސައިލްގެ ބޮޑު ބައެއް ވައިގެ ތެރޭގައި ވަނިކޮށް ހަލާކު ކޮށްލާފައި ވާކަމަށް އިސްރާއީލުން ބުނެފައި ވެއެވެ. މި ޙަމަލާތަކަކީ އީރާނުން އިޒްރޭލަށް ސީދާ އެޤައުމުގެ އަމިއްލަ ފަސްގަނޑުން ހަމަލާދިން ފުރަތަމަ ފަހަރެވެ.
މި ހަމަލާތަކަށްފަހު ރައީސް މައުމޫން ކުރެއްވި އެކްސް ޕޯސްޓެއްގައި ވިދާޅުވީ، އިޒްރޭލުގެ ހަމަލާތަކާ ދެކޮޅަށް އީރާނުން ރޭ އަމިއްލަ ދިފާއުގައި އެޅި ވަރުގަދަ ފިޔަވަޅަށް ވަރަށް ހޫނު މަރުހަބާއެއް ދަންނަވާ ކަމުގައެވެ.
ހިތްވަރުގަދަ އީރާނާއި އެހެނިހެން މުސްލިމް ހަނގުރާމަވެރިންނަށް މާތް الله ކާމިޔާބީ މިންވަރު ކުރައްވާށިއެވެ!
ރައީސް މައުމޫނުގެ އެކްސް ޕޯސްޓުގައި ވިދާޅުވެފައި ވެއެވެ.
މި ހަމަލާތަކަށްފަހު އިސްރާއީލުން ބުނެފައިވަނީ، ކުރޫޒް މިސައިލުންނާއި ޑްރޯންއިން އިސްރާއީލަށް ދިން ހަމަލާތަކުގެ ބަދަލު، އެންމެ އެކަށީގެންވާ ގޮތުގައި ހިފާނެކަމުގައެވެ.
އިޒްރޭލުން ރައްދު ދޭން ރާވާފައިވަނީ ކިހިނެއް ކަމެއް ނޭނގުނު ނަމަވެސް ހަނގުރާމައިގެ ކެބިނެޓް މިނިސްޓަރު ބެނީ ގަންޓްޒް ވަނީ އީރާނުން ދިން ހަމަލާގެ "އަގެއް ސީދާ ކުރާނެ" ކަމަށް ވިދާޅުވެފަ އެވެ.
އިޒްރޭލުގެ އަސްކަރިއްޔާއިން ބުނީ އިޒްރޭލުގެ ދެކުނުގައި ހުރި ބޭސްއެއް ހިމެނޭ ގޮތަށް އެގައުމުގެ ސަރަހައްދަށް މަދު އަދަދެއްގެ ހަމަލާތަކެއް ރޭ އަމާޒުވެފައިވާ ކަމުގައެވެ.
އިރާނުން އިސްރާއީލަށް އަމާޒުކޮށް އަސްކަރީ ހަމަލާތައް ލޯންޗު ކޮށްފައިމިވަނީ އިސްރާއިމް ސީރިއާގެ ވެރިރަށް ދަމަސްކަސްގައި ހުންނަ އިރާނުގެ އެމްބަސީއަށް އެޕްރިލްމަހުގެ 1 ވަނަ ދުވަހު ހަމަލާދީ އެގައުމުގެ އަސްކަރިއްޔާގެ ކޮމާންޑަރުންތަކެއް ޝަހީދު ކޮށްލުމުގެ ބަދަލު ހިފުމުގެ ގޮތުންނެވެ. އަދި އިސްރާއީލުގެ ހަމަލާތަކުގެ ބަދަލު ހިފާނެކަމަށް އިރާނުން ތަކުރާރުކޮށް ދެމުންދިޔަ އިންޒާރުތަކަށް ފަހުގައިވެސް މެއެވެ.
އެމެރިކާގެ ރައީސް ޖޯ ބައިޑަން ވިދާޅުވީ އިޒްރޭލަށް "އަމާޒުކުރި ޑްރޯންތަކާއި މިސައިލްތަކުގެ ތެރެއިން ގާތްގަނޑަކަށް ހުރިހާ ޑްރޯންތަކެއް ނައްތާލުމަށް އެމެރިކާ އިން އެހީވި" ކަމަށެވެ.
މި ހަމަލާތަކަށްފަހު، ކެތްތެރިވުމަށް ދުނިޔޭގެ ލީޑަރުން ބާރު އަޅުއްވަމުން ގެންދަވާއިރު، އީރާނުން ބުނެފައިވަނީ އިޒްރޭލުން ރައްދު ހަމަލާ ދީފިނަމަ އިހުނަށްވުރެ ވަރުގަދަ ހަމަލާތަކެއް އިސްރާއީލަށް އަމާޒުކޮށް ފޮނުވާލާނެ ކަމުގައެވެ.
