ރައްޔިތުން ރިސްކު ނުނަގާ، ކުރިޔަށް އޮތް ތައްޔިތުންގެ މަޖިލިހަށް ހޮއްވަވާ ދެއްވަންވީ ނަތީޖާ ނެރެދިނުމުގެ އަޒުމުގައި ތިބި މެމްބަރުން ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ މި މަހުގެ 21 ގައި ބާއްވާ ރައްޔިތުންގެ މަޖިލިސް އިންތިހާބުގައި ޕީޕީއެމް/ޕީއެންސީގެ ޓިކެޓުގައި ވާދަކުރާ ކެންޑިޑޭޓުންގެ ކެމްޕެއިން ހަރަކާތްތަކަށް އަމާޒުކޮށް ސިލްސިލާކޮށް ކޮންމެ ރެއަކު ވެސް ބާއްވަމުން ގެންދަވާ ބައްދަލުވުމުގައި ރޭގެ އިވެޓުގައި ވާހަކަ ދައްކަވަމުންނެވެ.
އަދި ސަރުކާރުގެ ކެންޑިޑޭޓުންނަށް ވޯޓު ދެއްވުމަށް ރޭވެސް ރައީސް މުއިއްޒު ވަނީ ތަކުރާރުކޮށް އަދިވަޑައިގެންފައެވެ. ރައީސް ވިދާޅުވީ ވެރިކަމަށް މިވީ ހަތަރު މަސް ދުވަހުގެ ތެރޭގައި ސިޔާސަތުތައް ތަންފީޒު ކުރުމަށް ދިމާވި އެންމެ ބޮޑު ދައްޗަކީ މަޖިލީހުގަ އިދިކޮޅުގަ އޮތް އަޣުލަބިއްޔަތުން ޖެއްސުންކޮށް އުނދަގޫ ކުރުން ކަމުގައެވެ.
އެހެންވީމަ ރައްޔިތުން މިކަމުގައި ރިސްކެއް ނުނަގަންވީ. އެހެންވީމަ ސާފުކޮށް ފެންނަން އޮތް ހަގީގަތް ގަބޫލު ކުރައްވައި، ރައްޔިތުންގެ މަޖިލީހަށް ރައްޔިތުންނަށްޓަކައި ސަރުކާރުން ނަތީޖާ ނެރެދިނުމަށްޓަކައި މި އަޒުމުގައި ތިބި ބޭފުޅުން ހޮވައިދޭން ވީ.
ރައީސް މުއިއްޒު ވިދާޅުވިއެވެ.
ރޭގެ ޖަލްސާގައި ރައީސް ވިދާޅުވީ ހެޔޮ ވެރިކަމަކާއި އެކު، ނަތީޖާ ނެރެން މަގު ހޯދުން އޮތީ ރައްޔިތުންގެ އަތް މަތީގައިކަމަށްވުމާއި އެކު އިންތިހާބުގައި މިކަންކަމަށް ރައްޔިތުން ވިސްނުމަށެވެ. އަދި ވިދާޅުވީ ސަރުކާރަށް އެއްބާރުލުން ނުދޭނެ މެމްބަރުންތައް މަޖިލީހަށް ހޮވިގެން އައުމަކީ ފަހަތަށް އެޅޭ ފިޔަވަޅެއް ކަމަށެވެ.
ރައީސް ވިދާޅުވީ ރަށްތަކުގެ ތަރައްގީއަށް ރައްޔިތުން އެދިގެން ވެފައި ހުރި އެތައް ވައުދެއް އެބަހުރިކަމަށާއި، އެ ހުވަފެންތަކުގައި ކުލަ ޖައްސައިދޭނެކަމުގެ ފުރިހަމަ ޔަގީންކަން ދެއްވާކަމުގައެވެ.
