އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އަލުން އިމާމްވެ ނަމާދު ކުރައްވަން ފައްޓަވަން ނިންމަވައިފިއެވެ.
ޝަހީމް މި ދޭތެރެއިން އިމާމްވެ ނަމާދު ކުރެއްވުން މެދުކަނޑާލެއްވީ ގިނައިރު ކޮޅަށް ނުހުރެވޭތީ އަވަސް ސާޖަރީއެއް ކުރައްވަން ޖެހިވަޑައިގަތުމުންނެވެ. ސާޖަރީ ފުރިހަމަ ކުރެއްވުމަށް ފަހުގައި އަނެއްކާ ވެސް ޝަހީމް ވަނީ ހިދުމަތަށް ނުކުންނަވައިފައެވެ.
އިސްލާމީ ކަންތައްތަކާ ބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދު، މިރޭ އިސްލާމީ މަރުކަޒުގައި އިމާމުވެ ދަމު ނަމާދު ކުރައްވާނެ ވާހަކަ މައުލޫމާތަށްޓަކައި ދަންނަވަން. pic.twitter.com/xzJ4NzLiQi
— Ministry of Islamic Affairs (@MVIaffairs) April 5, 2024
އިސްލާމިކް މިނިސްޓްރީން "އެކްސް" ގައި ކުރެއްވި ޕޯސްޓެއްގައި ވިދާޅުވީ ޝަހީމް މިރޭ އިސްލާމީ މަރުކަޒުގައި އިމާމުވެ ދަމު ނަމާދު ކުރައްވާނެ ކަމަށެވެ.
ގިނަ އިރު ކޮޅަށް ހުރުމަށް ދަތިވާ ސިއްހީ ސަބަބެއް މެދުވެރިވެގެން، ޑޮކްޓަރުންގެ ލަފާމަތިން ޝަހީމް އިމާމުވެ ތަރާވީސްކުރުން މެދުކަނޑާލެއްވީ މިދިޔަ މަހުގެ 23 ގައެވެ. ޝަހީމް ވިދާޅުވެފައި ވަނީ ފަރުވާގެ ކަންކަން ފުރިހަމަވުމުން އަލުން އިމާމުކަމަށް އައުމަށް އުންމީދުކުރައްވާ ކަމަށެވެ. އިމާމުކަމަކީ ކުޑައިރުން ފެށިގެން ވަރަށް ލޯތްބާއި ޝައުޤުވެރިކަމާއެކު ކުރާކަމެއް ކަމަށް ވިދާޅުވިއެވެ.
މި ރޯދަ މަހުގައި ޝަހީމް ހުޅުމާލޭގެ ފުރަތަމަ ފިޔަވަހީގައި ހުންނަ ރަޝީދު މިސްކިތުގައި އިމާމުގެ ތަރާވީސްކުރައްވައެވެ. އަދި އިސްލާމީ މަރުކަޒުގައި އެމަނިކުފާނު އިމާމުވެ ބައެއް ނަމާދުތައް ވެސް ކުރައްވައެވެ.
