އަންނަ މަހުގެ 21 ވަނަ ދުވަހު އޮންނަ ރައްޔިތުންގެ މަޖިލިހުގެ އިންތިހާބާ ގުޅޭ 8 މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގު ކުރަން ފަށައިފިއެވެ.
އޭސީސީން ބުނީ މަޖިލިސް އިންތިހާބާ ގުޅިގެން 10 ޝަކުވާއެއް ލިބިފައިވާ ކަމަށެވެ. އަދި 8 ޝަކުވާއެއް ރަޖިސްޓްރީކޮށް ބަލަން ފަށާފައިވާ ކަމަށް ކޮމިޝަނުން ބުންޏެވެ.
އޭސީސީ އަށް ހުށަހެޅި މައްސަލަތަކުގެ ތެރޭގައި މައިގަނޑު ގޮތެއްގައި ހިމެނެނީ ދައުލަތުގެ ވަސީލަތްތައް ނަހަމަ ގޮތުގައި ބޭނުން ކުރުމާއި ކެންޑިޑޭޓުން ދައްކާ ވާހަކަތަކާއި ވައުދުތަކާ ގުޅޭ މައްސަލަތަކެކެވެ.
މަޖިލިސް އިންތިހާބާ ގުޅޭ ކަރަޕްޝަންގެ މައްސަލައެއް ފާހަގަ ކުރެވޭނަމަ، އެ މައްސަލައެއް އޭސީސީއަށް ހުށަހެޅުމަށް އެ ކޮމިޝަނުން މީގެކުރިން ވަނީ އެދިފައެވެ.
މަޖިލިސް އިންތިހާބުގެ ކެމްޕެއިން ވަރަށް ފޯރިއާ އެކުގައި ކުރިއަށްދާ އިރުގައި މި އިންތިހާބުގައި 369 ކެންޑިޑޭޓުން ވާދަކުރެއެވެ. އޭގެ ތެރޭ ހިމެނެނީ 326 ފިރިހެން ކެންޑިޑޭޓުން 43 އަންހެން ކެންޑިޑޭޓުންނެވެ. މިފަހަރު 93 ދާއިރާއަކަށް މެމްބަރުން އިންތިހާބު ކުރުމަށް ހަމަޖެހިފައިވެއެވެ.
