އާރުޑީސީގެ ޚިޔާނާތާއި ގުޅޭ މީހުންގެ މައްސަލަ ވަރަށް އަވަހަށް ޕީޖީއަށް ފޮނުވަނީ

ރައީސް އިބުރާހިމް މުހައްމަދު ސާލިހުގެ ސަރުކާރުގައި އާރިޑީސީގެ ފައިސާއަށް ޚިޔާނާތްތެރިވެފައިވާ މީހުންގެ ތަހުގީ މިހާރު ނިމުމަކާއި ހަމައަށް އައިސްފައިވާ ކަމަށާއި، އެ ފަރާތްތަކުން އޮޅުވާލައިގެން މަކަރާއި ހީލަތުން ފައިސާ ހިޔާނަތްތެރިވެފައިވާކަން ތަހުޤީޤަށް ވަނީ ހޯދިފައިވާކަމަށް ފުލުހުން ވިދާޅުވެއްޖެއެވެ.

ފުލުހުންގެ ކްރައިމް އިންވެސްޓިގޭޝަން ކޮމާންޑްއިން ތަހުގީގު ކުރަމުންދާ ކަންކަމާއި ގުޅޭގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ފުލުހުންގެ ހެޑް އޮފް ފައިނޭންޝަލް ކްރައިމް ޔުނިޓްގެ އިންސްޕެކްޓަރ އޮފް ޕޮލިސް ޔޫސުފް ލޫތު ވިދާޅުވީ އެމީހުންގެ މައްސަލަ ވަރަށް އަވަހަށް ޕޮލިހަށް ފޮނުވާނެ ކަމުގައެވެ.

އޭނާ ވިދާޅުވީ އާންމު އުސޫލުން އާރްޑީސީން ވެސް މުއާމަލާތްތައް ހިންގަނީ ޗެކެއް މެދުވެރިކޮށް ފައިސާ ނަގައިގެން ކަމަށާއި، އެހެންނަމަވެސް ކޮވިޑުގެ ހާލަތުގައި ޗެކް މެދުވެރިކޮށް ފައިސާ ނެގުމުގައި ދަތިތަކެއް ހުރުމުން، އާރްޑީސީގައި މަސައްކަތް ކުރާ އިސް މުވައްޒަފުންގެ އެކައުންޓަށް ފައިސާ ޖަމާކޮށްގެން ދައުރު ކުރުވާފައި ހުރި ނަމަވެސް، ކޯވިޑްގެ ހާލަތު ނިމުމުންވެސް މި އުސޫލަށް ބަދަލު ގެނެސްފައި ނުވާކަމުގައެވެ.

އަދި އޭނާ ވިދާޅުވީ އުންމީދު ކުރަނީ ކުޑަ ދުވަސްކޮޅެއްގެ ތެރޭގައި ޕީޖީ އޮފީހަށް މި މައްސަލައިގައި ދައުވާ ކުރަން ފޮނުވޭނެ ކަމަށް ކަމަށެވެ.

އާންމު އުސޫލުން އާރްޑީސީން ވެސް މުއާމަލާތްތައް ހިންގަނީ ޗެކެއް މެދުވެރިކޮށް ފައިސާ ނަގައިގެން، އެހެންނަމަވެސް ކޮވިޑުގެ ހާލަތުގައި ޗެކް މެދުވެރިކޮށް ފައިސާ ނެގުމުގައި ދަތިތަކެއް ހުރުމުން، އާރްޑީސީގައި މަސައްކަތް ކުރާ އިސް މުވައްޒަފުންގެ އެކައުންޓަށް ފައިސާ ޖަމާކޮށްގެން ދައުރު ކުރުވާފައި ހުރީ، އެހެންނަމަވެސް ކޮވިޑުގެ ހާލަތު ނިމުމުން ވެސް އެގޮތަށް ކަންތައްތައް ކުރީ. އެ ފަރާތްތަކުން އޮޅުވާލައިގެން މަކަރާއި ހީލަތުން ފައިސާ ހިޔާނަތްތެރިވެފައިވާކަން ތަހުޤީޤަށް ވަނީ ހޯދިފައި. އުންމީދު ކުރަނީ ކުޑަ ދުވަސްކޮޅެއްގެ ތެރޭގައި ޕީޖީ އޮފީހަށް މައްސަލައިގައި ދައުވާ ކުރަން ފޮނުވޭނެ ކަމަށް.

ލޫތު ވިދާޅުވިއެވެ.

މި މައްސަލައާއި ގުޅޭގޮތުން ފުލުހުންގެ އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް، ޗީފް ސުޕްރިންޓެންޑެންޓް އަހުމަދު ނާފިޒު ވިދާޅުވީ މި މައްސަލައިގައި ތިން މީހަކު އުޅޭ ކަމަށް ތަހުގީގަށް އެނގިފައިވާ ކަމަށެވެ. އަދި އިތުރު 15 ވަރަކަށް މުވައްޒަފުންގެ ބައިވެރިވުން މި މައްސަލައިގައި ހިމެނޭ ކަމަށް ލަފާކުރެވޭ ކަމަށް ވެސް އޭނާ ވިދާޅުވިއެވެ.

ނާފިޒު ވިދާޅުވީ، މި ތިން މީހުންގެ ތެރެއިން އެކެއްގެ އަމިއްލަ އެކައުންޓަށް 11 މިލިއަން ރުފިޔާ ޖަމާކޮށްފައިވާ ކަމަށެވެ. އަދި އަނެއް މީހާގެ އެކައުންޓަށް ދެ މިލިއަން ރުފިޔާ ޖަމާކޮށްފައިވާއިރު، ތިންވަނަ މީހާގެ އަމިއްލަ އެކައުންޓަށް ތިން މިލިއަން ރުފިޔާ ޖަމާކޮށްފައިވާ ކަމަށްވެސް ނާފިޒް ވިދާޅުވިއެވެ.

އެކެއްގެ އެކައުންޓަށް 219 ޓްރާންސެކްޝަން ހެދިފައި ހުރިކަން އެބަ އެނގޭ، އެ އެކައުންޓްތަކަށް ފައިސާ ޖަމާކޮށްފައި ހުރި ގޮތް އެއީ ހޯދަންޖެހޭ ކަމެއް، ކޮންމެ ޓްރާންސެކްޝަނެއްގެ މައުލޫމާތު ވަކި ވަކިން ހޯދާ އެމީހުންނާއި ސުވާލުކުރަންޖެހޭ، ސަރުކާރުގެ އިސް ފަރާތްތަކުގެ ކުންފުނިތަކާއި އެކައުންޓްތަކަށް އާރްޑީސީގެ ފައިސާ ޖަމާވެފައިވޭ، އެކެއްގެ އެކައުންޓަށް އެބަހުރި އެކި ފަހަރު މަތިން 11 މިލިއަން ރުފިޔާ ވަދެފައި.

ނާފިޒް ވިދާޅުވިއެވެ.

ނާފިޒު އިތުރަށް ވިދާޅުވީ ވިދާޅުވީ އާރްޑީސީއާ ގާތްގުޅުމެއް އޮންނަ ފަރާތެއްގެ އެކައުންޓަށްވެސް ފައިސާ ވަދެފައިވާ ކަމަށެވެ. އެގޮތުން މި ޚިޔާނާތް ހިނގަމުން ދިޔައިރު އެމީހާގެ ކުންފުނީގެ އެކައުންޓަށް 393،000 ރުފިޔާ ވަދެފައިވާކަން ފާހަގަކުރެވިފައިވާ ކަމަށްވެސް އޭނާ ވިދާޅުވިއެވެ.

މިއަދުގެ ނޫސްވެރިންގެ ބައްދަލުވުމުގައި ފުލުހުން ވިދާޅުވީ އާރުޑީސީން ފައިސާ ދައުރު ކޮށްފައިހުރީ ދައުލަތުގެ ފައިސާ ބޭނުންކުރަންޖެހޭ އެންމެ އަސާސީ މިންގަޑާވެސް ޚިލާފަށް ކަމުގައެވެ.