ރައްޔިތުންގެ މަޖިލިހުގެ ޖަލްސާތައް ދެން ކުރިޔަށް ގެންދެވޭނީ، ސުޕްރިމް ކޯޓުގެ ހުކުމަށްފަހު، މަޖިލިހުގެ ގަވާއިދުގެ 242 ވަނަ މާއްދާއާމެދު ދެން އަމަލުކުރާނެ ގޮތެއް ނިމިގެން ކަމުގައި މަޖިލިސް ރައީސް މުހައްމަދު އަސްލަމް ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާ ފައްޓަވަމުން، ރިޔާސަތުގައި އިންނެވި މަޖިލީހުގެ ރައީސް މުހައްމަދު އަސްލަމް ވިދާޅުވީ، 49 ގައި ކުރިން ހިމެނުނު މާއްދާތަކަކީ ގާނޫނު އަސާސީ 278 ރޫހާ ހިލާފު މާއްދާތަކެއް ކަމަށް ނިންމާފައިވާއިރު، އޭގެ ފަހުން 242 ވަނަ މާއްދާއަށް ގެނައި އިސްލާހުގެ މަފްހޫމަކީ ވެސް އެއް ނަތީޖާއެއް ކަމަށެވެ.
މަޖިލީހުގެ 242 ގެ އެއް ވަނަ މާއްދާއަށް އަމަލުކުރެވެން ނެތް ކަމުގައި ދަންނަވަން. އެހެންނަމަވެސް ސުޕްރީމް ކޯޓުން އެ މާއްދާ އުވާލައިފައިނުވޭ. އަދި މަޖިލީހުގެ ގަވައިދުގެ އެ މާއްދާ އުވާލެވޭނީ މަޖިލީހުން.
އަސްލަމް ވިދާޅުވި އެވެ.
މަޖިލިހުގެ ވޯޓު ހަމަކުރުމަށް މެމްބަރުންގެ އަދަދު ގުނާއިރު، ހުސް ގޮނޑިތައްވެސް ހިމަނަންޖެހޭނެކަމަށް ސުޕްރިމް ކޯޓުން ނިންމިއިރު، މަޖިލިހުގެ ގަވާއިދުގައި އެކަމާއި ގުޅޭގޮތުން އޮތް މާއްދާ ބާތިލް ކޮށްފައި ނުވާތީ، ސަރުކާރުގެ މަގާމުތަކަށް ދާން މެމްބަރުކަމުން އިސްތިއުފާ ދިން މެމްބަރުންގެ ގޮނޑިތައް ނުހިމަނައި ޖުމްލަ އަޣުލަބިއްތަތު ގުނާ މައްސަލައިގައި މަޖިލިހުން ގޮތެއް ނިންމައި ދިނުމަށް މަޖިލިސް ރައީސް އަސްލަމް ވަނީ މިއަދުގެ މަޖިލިހަށް ހުށަހަޅުއްވާފައެވެ.
އޭނާ ހުށަހެޅުއްވީ މަޖިލިސްގެ ގަވައިދުގެ 242 ގެ 1 ވަނަ މާއްދާގެ ގޮތުގައި އިތުރުކޮށްފައިވާ މާއްދާއާއި މެދު ގޮތެއް ނިންމައި އުވާލަދިނުމުގެ މައްސަލަ އެވެ.
އަސްލަމް ވިދާޅުވީ މަޖިލީހުގެ ޖަލްސާތައް ފެށޭނީ، ކޯރަމްއަކަށް ބެލުމަށްފަހުކަމަށާއި އަހަން ޖެހޭ މުހިންމު ވޯޓުތަކަށް ދެވެން އޮތީ ވެސް އެއަށް ފަހު ކަމަށެވެ. އެހެންކަމުން ދެން ގަވައިދާ މެދު ގޮތެއް ނިންނަން ކޮމިޓީއަކަށް ފޮނުވާނީ ތޯ ނިންމައިދޭން އަސްލަމް ތަކުރާރުކޮށް ވިދާޅުވި އެވެ.
އެއީ ސުޕްރީމް ކޯޓުން މަޖިލީހުގެ އެ މާއްދާ އުނިކޮށްފައެއް ނުވޭ.. އެހެންވީމަ ދެން، މަޖިލުހުންނޭ ދެން ގޮތެއް ނިންމާނީ..
އަސްލަމް ވިދާޅުވިއެވެ.
މީގެ ކުރިން ބާއްވަން މަސައްކަތް ކުރި ދެ ހަފްތާގެ ޖަލްސާ ވެސް ކުރިޔަށް ނުގެންދެވުނީ، ކޯރަމް ހަމަނުވުމުގެ ސަބަބުންނެވެ. އަސްލަމް ވިދާޅުވީ މިއަދުގެ ޖަލްސާ ފަށަން ކޯރަމްއަށް ބެލީ 22 މެމްބަރުންކަމަށެވެ. އަދި މަޖިލީހުގެ އެއްވެސް މަސައްކެތެއް ކުރިޔަށް ގެންދެވޭނީ، ގޮތެއް ނިންމައިގެންކަމަށްވާއިރު ގަވައިދެއް އެއީ ބާތިލު ގަވައިދެއް ނަމަ އެ އެގޮތުގައި ނުބޭއްވޭނެކަމަށް އަސްލަމް ވިދާޅުވި އެވެ.
މިމައްސަލައާއި ގުޅޭގޮތުން ސަރުކާރަށް ތާއީދުކުރާ މެމްބަރުން ވިދާޅުވީ ސުޕްރީމް ކޯޓުން އެ ގޮތަށް ހުކުމް ކޮށްފައިވާއިރު، އަމަލު ކުރަން ޖެހޭ ގޮތް ސާފުވާތީ އިތުރަށް ގޮތް ނިންމަން ނުޖެހޭނެ ކަމަށް ވިދާޅުވެފަ އެވެ. ސަރުކާރު ހިންގާ ޕީއެންސީއަށް ނިސްބަތްވެވަޑައިގެންނަވާ ކުރެންދޫ ދާއިރާގެ މެންބަރު އަބްދުލްޣަނީ އަބްދުލްހަކީމް ވިދާޅުވީ މި މާއްދާ ބާތިލް ކުރަން މަޖިލީހުގެ ރައީސަށް ވެސް ކޮމިޓީއަށް ފޮނުވޭނެ ކަމަށެވެ.
އެކަމާ ގުޅިގެން އަސްލަމް ވިދާޅުވީ، އެކަން ކުރެވިދާނެ ކަމަށާއި ނަމަވެސް މަޖިލީހުގެ އެއްވެސް ޖަލްސާއެއް އިތުރަށް ކުރިއަށް ގެންދެވެން އޮތީ މި މައްސަލާގައި ގޮތެއް ނިންމިގެން ކަމަށެވެ.
އަޅުގަނޑަށް މަޖިލީހުގެ އެއްވެސް ޖަލްސާއެއް މަސައްކަތެއް ވެސް ކުރިއަށް ގެންދެވޭނީ މަޖިލީހުގެ ކޯރަމްގެ ދިމާވާ މައްސަލަ މުޅިން ސާފުވެ ނިމިގެން. މަޖިލީހުން އެކަމަށް ގޮތެއް ނިންމައިގެން.
އަސްލަމް ވިދާޅުވި އެވެ.
ރައީސް އަޒުލްކުރުމަށް މެމްބަރުން އަދަދު ގުންނަޖެހޭނީ ހުސްގޮނޑި ހިމަނައިގެން ކަމުގައި ސުޕްރިމް ކޯޓުން ހުކުމް ކޮށްފައިވަނީ ފާއިތުވި ފެބްރުއަރީމަހުގެ 29 ވަނަ ދުވަހުއެވެ.
ރައީސްއާއި ނާއިބު ރައީސް އަޒުލްކުރެވޭގޮތަށް ލުއިކަން ގެނެސް، މަޖިލިހުގެ ގަވާއިދަށް ގެނެސްފައިވާ އިސްލާހުގެ މައްސަލަ ބަންޑާރަނައިބުގެ އޮފީހުން ސުޕްރިމް ކޯޓަށް ހުށަހެޅި މައްސަލާގައި ކުރި ހުކުމްގައި ސުޕްރިމް ކޯޓުން ވިދާޅުވީ ރައްޔިތުންގެ މަޖިލީހުގެ ޖުމުލަ މެންބަރުންގެ އަދަދު 80 އަށް ހަދަން މަޖިލީހުގެ ގަވާއިދުގެ 49 ވަނަ މާއްދާއަށް ގެނައި ބަދަލު ގާނޫނުއަސާސީއާ ހިލާފު ކަމަށާއި އެހެންނަމަވެސް އެ މާއްދާ މިހާރު ބާތިލުކޮށްފައިވާތީ ކުރެވޭނެ ކަމެއް ނެތް ކަމަށެވެ.
