1445 ވަނަ އަހަރުގެ ބަރަކާތްތެރި ރަމަޟާންމަހަށް ހުރިހާބޭފުޅުންނަށް މަރުޙަބާ އާއި ތަހުނިޔާ އަރިސްކުރަމެވެ. މި ރަމަޟާންމަހަކީވެސް ހުރިހާ ބޭފުޅުންނަށް ފައިދާހުރި މައްސަރެއްކަމުގައި ލެއްވުން އެދި ދުޢާކުރަމެވެ.
ބޭފުޅުންނޭވެ! ރަމަޟާންމަސް މިއައީ މުސްލިމުންގެ ހިތްތަކަށް އުފާވެރިކަމާއި ހިތްހަމަޖެހުން ވައްދަމުންނެވެ. ޔަޤީނުންވެސް މި އުފާވެރިކަމަކީ މުސްލިމަކަށް ވެގެންނޫނީ އިޙްސާސްކުރަން ނޭގޭނޭހާ ބޮޑު އުފާވެރިކަމެކެވެ. އެހެނީ މިމައްސަރާއި މުސްލިމުން ބައްދަލުކުރުމުން، މުސްލިމުންގެ ހިތްތަށް ފޮޅިގެންދެއެވެ. މޫނުމައްޗަށް އުފާވެރިކަން އާދެއެވެ. އަދި ތުންފަތްތަކަށް ހިނިތުންވުން ގެނުވައެވެ.
ލޮބުވެތި އަޚުންނެވެ! ރޯދަމަސް އަޅުގަނޑުމެންނާއި ބައްދަލުކޮށްފައި މިވަނީ ﷲ ގެ ޙަޟްރަތުން ތަނަވަސްވެގެންވާ ރަޙުމަތުގެ ދޮރުކޮޅުތަކާއި ގެންނެވެ. ވީމާ މިމައްސަރު، އަޅުގަނޑުމެންނާއި ބައްދަލުކުރި ކުރުމަކީ ނިކަންބޮޑު ނިޢުމަތެއްކަން ކަށަވަރެވެ.
ކުރީގެ ހެޔޮބޭކަލުން ރޯދަމަސް އައުމުގެ ހަ މަސްދުވަސް ކުރިން، ރޯދަމަސް، އެބޭކަލުންނާއި ބައްދަލުކުރުމުގެ ތައުފީޤު ދެއްވާތޯ އަރަހުށި ﷲ ތަޢާލާއަށް ގިނަގިނައިން ދުޢާކޮށް އުޅުއްވިއެވެ. އަދި އެބޭކަލުންނާއި ރަމަޟާން މަސް ބައްދަލުވެެއްޖެނަމަ، ޖެހިގެން އޮތް ހަ މަސްދުވަހު، އެބޭކަލުން އެ ރަމަޟާންމަހުގައި އަދާކުރެއްވެވި މާތް އަޅުކަންތައްތައް ﷲ ތަޢާލާ ޤަބޫލުފުޅު ކުރައްވާތޯ ދުޢާދަންނަވަތެވެ.
ބޭފުޅުންނޭވެ! މިމައްސަރުގައި ޘަވާބާއި ރަޙުމަތްވަނީ ހުޅުވާލެވިފައެވެ. އެކަން ހޯދައިގަންނަން ބޭނުންވާމީހުން، ﷲ ގެ މަގަށް އަވަހަށް އަންނަހުށިކަމެވެ. އުފާވެރިކަން ހޯދާހުށިކަމެވެ.
ޙަޤީޤީ ހަމަޖެހުން ހިތަށް ލިބިގެން ދާނީ، މިމައްސަރުގައި ތިމާގެ ޢަމަލުތައް ބައްޓަންކުރެވޭ ހެޔޮގޮތްތަކެއްގެ މައްޗަށެވެ! ފުރަތަމަ ފަރުޟު ތަކަށް ރައްކާތެރިވާށެވެ! އެގޮތުން ފަރުޟު ފަސްނަމާދު ވަރަށް މުހިންމެވެ. އަދި ރޯދައިގެ ވާޖިބު އަދާކުރުމުގައި، ކެއުންބުއިމުން ދުރުހެލިވާފަދައިން ޝަހުވަތްތަކާއި، ދުލުގެ ނުބައިކަމުން އެހެން މުސްލިމުން ރައްކާތެރިކުރާށެވެ!
ރޯދައިގެ ޙަޤީޤީ ފައިދާ ލިބެން އޮތީ އެގޮތުންނެވެ. ފަރުޟުތަކަށްފަހު، ސުންނަތްތަކަށްވެސް ވީހާވެސް ބޮޑަށް ރައްކާތެރިވާށެވެ! ރޭއަޅުކަމާއި، ޤުރްއާންކިޔެވުމާއި، ހިފްޒުކުރުމާއި، އޭގެ މާނައާއިމެދު ވިސްނައި ފިކުރުކުރުން މިހުރީ ހައްތާވެސް ހެޔޮކަމެވެ. ދުނިޔެއާއި އާޚިރަތުގެ ބާއްޖަވެރިކަން ލިބޭނީ އޭރުންނެވެ.
ތަޤްވާވެރިއަކަށް ވެވޭނީ އޭރުންނެވެ.
