ކުރީގެ ރައީސް އިބްރާހީމް މުހައްމަދު ސޯލިހްގެ ސަރުކާރުގެ ސިޔާސީ މަގާމުތަކުގައި ތިއްބެވި އިސް ބައެއް ބޭފުޅުންގެ މައްސަލަތަކެއް އެންޓި ކޮރަޕްޝަން ކޮމިޝަން (އޭސީސީ) އިން ބަލަން ފަށައިފިއެވެ.
އޭސީސީން ބުނީ ސިޔާސީ މަގާމުތަކުގައި ކުރިން ތިއްބެވި ބައެއް މީހުން، މަގާމުގެ ނުފޫޒު ބޭނުންކޮށްގެން ސަރުކާރުގެ ބައެއް ކުންފުނިތައް މެދުވެރިކޮށް ނާޖާއިޒު މަންފާ ހޯދާފައިވާ ކަމަށް ބުނެ ހުށަހަޅިފައިވާ މައްސަލަތަކެއް ބަލަމުންދާ ކަމަށެވެ. އެހެންނަމަވެސް އެއީ އެ މައްސަލަތަކާބެހޭ އިތުރު ތަފުސީލެއް ކޮމިޝަނުން ހާމަކޮށްފައެއް ނުވެއެވެ.
އެ ކޮމިޝަނުން މިހެން ބުނެފައި ވާއިރު، ކުރިގެ ސަރުކާރުގެ ބައެއް އިސްވެރިންނާއި އަދި މިހާރުގެ ބައެއް މަޖިލިސް މެމްބަރުންނާއި ގުޅުންހުރި ޚިޔާނާތުގެ ބޮޑެތި މައްސަލަތަކެއް އޭސީން ބަލަން ފަށާފައިވާކަމުގެ ވާހަކަތައް ދަނީ ދެކެވެމުންނެވެ.
އޭސީސީން ކުރީ ސަރުކާރުގެ ވެރިންތަކެއްގެ މައްސަލަތަކެއް ބަލަން ފެށި އިރު، އޭސީސީން އިއްޔެ އެސްޑީއެފްސީގެ އޮފީހަށް ވަދެ ވަނީ އެތަން ބަލައި ފާސްކޮށްފައެވެ.
