ފްލެޓް ލިބޭނެކަމަށް އޭސީސީން ނިންމާފައިވާ ލިސްޓެއްކަމަށް ބުނެ ސޯޗަލް މީޑިއާގައި ދައުރު ކުރަމުންދަނީ ސައްޙަ ލިސްޓެއް ނޫންކަމުގައި އެންޓި ކޮރަޕްޝަން ކޮމިޝަން (އޭސީސީ)އިން ބުނެފިއެވެ.
އޭސީސީން މިގޮރަށް ބުނެފައިވަނީ، ސޯޝަލް މީޑިއާ އެކައުންޓަކުން، އެ ކޮމިޝަންއިން ފްލެޓް ލިބްނެޖެހޭނެކަމަށް ނިންމާފައިވާ ލިސްޓެއްކަމަށް ބުނާ ލިސްޓެއް ދައުރު ކުރަން ފަށާފައި ވަނިކޮށެވެ.
މިމައްސަލައާއި ގުޅޭގޮތުން އޭސީސީން މިރޭ ނެރުނު ނޫސްބަޔާނެއްގައި ބުނެފައިވަނީ، ފްލެޓް މައްސަލައާ ގުޅޭގޮތުން އެ ކޮމިޝަނުގެ ތަހުގީގަށް ހޯދިފައިވާ ހޯދުންތަކުގެ މާއްޗަށް ބިނާކޮށް، ތަހުގީގުގެ ބޭނުމަށް ތައްޔާރު ކޮށްފައިވާ ލިސްޓެއްގެ މަޢުލޫމާތު މިހާތަނަށް ހިއްސާކޮށްފައިވާނީ، ހައުސިންގ މިނިސްޓްރީއާއި މަޖިލީހުގެ މިނިވަން މުއައްސަސާތަކުގެ ކޮމެޓީއާ އެކަނި ކަމަށެވެ.
އޭސީސީން ބުނެފައިވަނީ، އެލިސްޓާއިގުޅޭ އެއްވެސް މައުލޫމާތެއް ނުވަތަ ލިޔުމެއްވެސް އެކޮމިޝަންގެ މުވައްޒަފަކު އާންމު ކޮށްފައި ނުވާނޭ ކަމުގައެވެ.
އޭސީސީން އިތުރަށް ބުނެފައިވަނީ، ރައްޔިތުންނާއި ގުޅުންހުރި މިފަދަ ހައްސާސް މައްސަލައެއްގައި ހަގީގަތް އޮޅޭގޮތަށް ވާހަކަ ފެތުރުމަކީ ރައްޔިތުންގެ ހިތްތަކުގައި ނަފްރަތު އުފެއްދުމަށް ހިންގާ ނާތަހުޒީބު އަމަލެއްކަމުގައެވެ. އަދި ކޮމިޝަނުން ތަހުގީގުކުރާ މައްސަލަތަކުގެ މައުލޫމާތު ހާމަކުރަމުންދާނީ އެ ކޮމިޝަންގެ ރަސްމީ ސޯޝަލް މީޑިއާ އެކައުންތަކުންނާއި އަދި މީޑިއާއަށް ރަސްމީކޮށް މައުލޫމާތު ހިއްސާކޮށްގެން ކަމަށާއި، ކޮމިޝަންގެ މަސައްކަތްތަކަށް އެއްވެސް ފަރާތެއްގެ ނުފޫޒު ނުފޯރާނެ ކަމަށްވެސް ބުނެފައު ވެއެވެ.
