ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި، ގެދޮރުވެރިޔާ ސްކީމުން ހުޅުވާލި ފްލެޓްތައް ދޭން ނިންމި ޝަރުތު ހަމަނުވާ މީހުންގެ ލިސްޓު އާއްމުކުރުމާ މެދު އަދި ގޮތެއް ނުނިންމާ ކަމަށް އެންޓި ކޮރަޕްޝަން ކޮމިޝަން (އޭސީސީ)ން ބުނެފި އެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް އޭސީސީ ހާޒިރުކުރީ ފަހި ދިރިއުޅުން ކޯޕަރޭޝަން (އެފްޑީސީ) އިން ތަރައްގީ ކުރަމުން އަންނަ 4،000 ފްލެޓާ ގުޅޭ ގޮތުން އާންމު ފަރާތަކުން ރައްޔިތުންގެ މަޖިލީހަށް ފޮނުވި ސިޓީއަކާ ގުޅިގެންނެވެ.

ލިސްޓުގައި ހިމެނޭ ބައެއް ފަރާތްތަކަށް ކޮލިފައިވުމަށް ބޭނުންވާ ޕޮއިންޓް ނުލިބޭ ނަމަ، އެ ނަންތައް ހިއްސާކުރުމަށް ނުވަތަ ޝަރުތު ހަމަނުވާ ސަބަބު އެ ފަރާތްތަކަށް އެންގުމަށް ކޮމިޓީގެ ބައެއް މެންބަރުން ވަނީ އެދިފަ އެވެ.

މެންބަރުން ވިދާޅުވީ ފްލެޓް ލިބުނު މީހުންގެ ލިސްޓުގައި ހިމެނޭ މީހުންގެ ތެރެއިން 60 އިންސައްތަ މީހުންނަކީ ހަގީގަތުގައި ޝަރުތު ހަމަނުވާ މީހުން ކަމަށް އޭސީސީން ހިއްސާކޮށްފައިވާތީ، އެއީ ކޮން ފަރާތަކުންތޯ ތަފްސީލް ހާމަކުރަން ޖެހޭ ކަމަށާއި، އެގޮތުން ކަމާބެހޭ ފަރާތްތަކަށް ޖަވާބުދާރީވެވޭނެ ކަމަށެވެ.

އެހެންކަމުން މި ލިސްޓު އާންމު ކުރާނެތޯ ބައެއް މެންބަރުން ސުވާލު ކުރެއްވި އިރު އަނެއް މެމްބަރުން ވަނީ އެ ނިންމުން ފޯމު ހުށަހެޅި ފަރާތްތަކަށް ވެސް އަންގާނެތޯ ސުވާލު ކުރައްވާފަ އެވެ. ރައްޔިތުންގެ މަޖިލީހުގެ މެމްބަރުން ހުށަހެޅުއްވި ސުވާލުތަކަށް ޖަވާބު ދެއްވަމުން އޭސީސީގެ ރައީސް އާދަމް ޝާމިލް ވިދާޅުވީ ޝަރުތު ހަމަނުވާ ކެންޑިޑޭޓުންގެ ލިސްޓު އާންމު ކުރާނެތޯ އިތުރަށް މަޝްވަރާ ކުރަން ޖެހޭނެ ކަމަށެވެ. އަދި އެކަމާ މެދު އަދި ވަކި ގޮތެއް ނިންމާފައި ނުވާ ކަމަށް އޭނާ ވިދާޅުވި އެވެ.

ތިނަދޫ ދެކުނު ދާއިރާގެ މެމްބަރު އަބްދުالله ސަނީފް ކުރެއްވި ސުވާލަކަށް ޖަވާބު ދެއްވަމުން ޝާމިލް ވިދާޅުވީ މުޅި ލިސްޓު އާންމު ކުރާނެތޯ ނުވަތަ ނޫންތޯ އަދި މަޝްވަރާކޮށް ގޮތެއް ނުނިންމާ ކަމަށެވެ.

ޝަމީލް ވިދާޅުވީ ފްލެޓް ލިބުނު މީހުންގެ ލިސްޓު ބެލުމަށްފަހު ޝަރުތު ހަމަވާ އަދި ފޯމު ހުށަހެޅުމުގައި އެއްވެސް މައްސަލައެއް ނެތް ފަރާތްތަކަށް ފްލެޓް ދޫކުރުމުގެ މަސައްކަތް ކުރިއަށް ގެންދިއުމަށް ހައުސިން މިނިސްޓްރީއަށް ކޮމިޝަނުން ލަފާ ދީފައިވާ ކަމަށެވެ.

އެ އުސޫލާއި އަޅުގަނޑުމެން ކަނޑައަޅާފައިވާ އަސާސްގެ މައްޗަށް ބިނާކޮށް ކުރިއަށް ގެންދިއުމަށް އަޅުގަނޑުމެން ވާނީ ހައުސިން މިނިސްޓްރީއަށް އަންގާފައި. އެކަން އަވަސް ކުރަން މިސާލަކަށް ތަހުގީގަށް ފާހަގަކުރެވުނު ކަންކަމުގެ އެހީތެރިކަން ބޭނުންވާ ނަމަ މިނިސްޓްރީއަށް އަޅުގަނޑުމެން ދޭނަން.

ޝާމިލް ވިދާޅުވި އެވެ.

އޭނާ ވިދާޅުވީ ފްލެޓް ދިނުމުގައި ލަސްތަކެއް ދިމާވެ، ރައްޔިތުންގެ ހައްގުތައް ގެއްލި، އޭގެ ނަތީޖާއެއްގެ ގޮތުން ކޮރަޕްޝަންގެ ފުރުސަތު އުފެދޭ ނަމަ، އެކަމާ މެދު ފިޔަވަޅު އެޅުމަކީ އޭސީސީގެ މެންޑޭޓުގެ ތެރޭގައި ހިމެނޭ ކަމެއް ކަމަށެވެ.

ކުރީގެ ސަރުކާރުން ތައާރަފްކުރި ބޯހިޔާވަހިކަމުގެ ސްކީމްގެ ދަށުން ފްލެޓް ލިބުނު މީހުންގެ ދާއިމީ ލިސްޓެއް ކުރީ ސަރުކާރު ނިމުމުގެ ދެ ދުވަސް ތެރޭގައި ނެރުނުއިރު، އޭސީސީން އޭރު ވަނީ ފްލެޓް ދޫކުރުން ހުއްޓާލުމަށް އަންގާފަ އެވެ. އެ ލިސްޓު އާންމުކުރުމާ އެކު ފްލެޓްތަކާ ބެހޭ ގޮތުން ގާތްގަނޑަކަށް 300 އެއްހާ މީހުން ޝަކުވާ ހުށހެޅި އެވެ. ދެ މަސް ދުވަހުގެ ތަހުގީގަށް ފަހު އެ ކޮމިޝަނަށް އެނގުނު ގޮތުގައި 4،000 މީހުންގެ ތެރެއިން 60 ޕަސެންޓް މީހުންނަކީ ޝަރުތު ހަމަނުވާ މީހުންނެވެ. ޝަރުތު ހަމަވާ ބާކީ ހުރި ފޯމްތަކުގެ ތެރެއިން 20.7 އިންސައްތަ ފޯމުގައި އެއްވެސް މައްސަލައެއް ނެތެވެ. އަނެއް 19.7 އިންސައްތަ ފޯމުގައި ޝަރުތު ހަމަވި ނަމަވެސް ޝައްކު އުފެދޭ މައުލޫމާތުތައް ހުއްޓެވެ.

އެހެންނަމަވެސް، އޭސީސީގެ ތަހުގީގުގެ ސައްހަކަމާ މެދު ވެސް ކޮމިޓީގެ ބައެއް މެންބަރުން ވަނީ ސުވާލު އުފައްދަވައިފަ އެވެ. ނަމަވެސް އޭސީސީން ބުނީ ޕޮއިންޓް އިތުރުކުރުން ފަދަ އެއްވެސް ކަމެއް ކޮށްފައި ނުވާ ކަމަށާއި އެ ތަހުގީގު ކުރިއަށް ގެންގޮސްފައިވަނީ ޕެންޝަން އޮފީހާއި އެންސްޕާ އާއި އިކޮނޮމިކް މިނިސްޓްރީ އާއި ސިވިލް ސާވިސް ކޮމިޝަނާއި އެޑިއުކޭޝަން މިނިސްޓްރީ އާއި ޕޯޓަލްއާ ގުޅިފައިވާ ނެޝަނަލް ރެޖިސްޓްރޭޝަންގެ މައުލޫމާތު އެއްކޮށްގެން ކަމަށެވެ.

އޭސީސީން ބުނީ މި ހުރިހާ މައުލޫމާތެއް ފަސޭހައިން ލިބެން ހުރި ނަމަވެސް އެންމެ ފުރަތަމަ އެޕްލިކޭޝަން ފޯމްތައް އިވެލުއޭޓް ކުރިއިރު ވެސް އެ މައުލޫމާތު ލިބިފައި ނުވާ ކަމަށެވެ. ހައުސިން މިނިސްޓަރު އަލީ ހައިދަރު މީގެ ކުރިން ވިދާޅުވެފައި ވަނީ އޭސީސީގެ ތަހުގީގަށްފަހު، ހުރި މައްސަލަތައް ފާހަގަވުމުން އެ ކޮމިޝަނާއި ބަންޑާރަ ނައިބާއި ސަރުކާރުގެ އެހެނިހެން އިދާރާތަކުގެ މަޝްވަރާގެ މަތިން ގޮތެއް ނިންމަވާނެ ކަމަށެވެ.