އެމްޑީޕީއާއި ޑިމޮކްރެޓްސްގެ މެޖޯރިޓީ އޮތް މަޖިލިހުން ވަޒީރުނަށް ރުހުން ނުދޭން އުޅެނީ ޒަތީ ވެގެން ކަމުގައި ބަންޑާރަ ނައިބު އަހުމަދު އުޝާމް އާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ބައެއް ވަޒީރުންނަށް ރުހުން ނުދޭން އެމްޑީޕީއާއި ޑިމޮކްރެޓްސްއިން ނިންމުމާއި ގުޅިގެން ކުރި އެކްސް ޕޯސްޓެެއްގައި އުޝާމް ވިދާޅުވީ އޭނާ ވަޒީފާގެ ހައިސިއްޔަތުން ޕްރޮފެޝަނަލީ ނިންމާފަ އޮތް އެއްވެސް ނިންމުމަކާ ގުޅިގެން ރުހުން ނުދޭން ޖެހޭ އެއްވެސް ސަބަބެއް ނޯންނާނެ ކަމުގައެވެ. އަދި މިއީ ޒާތީ ކަމެއް ކަމަށް ވިދާޅުވަމުން އޭނާ ވިދާޅުވީ ޒާތީގޮތުން ޖައްސާލާ، ސަރުކާރު ބަލިކަށިކުރުމުގެ ނިޔަތުގަ ކުރާ މިކަހަލަ ކަންކަމުން ސަރުކާރު ބަލިކަށިވެސް ނުކުރެވޭނެ ކަމުގައެވެ.
ޑރ. ޝަހީމް ކުރެއްވި އެކްސް ޕޯސްޓެއްގައި ވިދާޅުވީ ޒާތީވެގެން ދިވެހިރާއްޖޭގެ ޑިމޮކްރާތީ ނިޒާމު ހަލާކު ކޮށްލަން ކުރާ މަސައްކަތްތައް ފެއިލް ވާނެ ކަމުގައެވެ.
މި ސަރުކާރުގެ ވަޒީރުންނަށް ރުހުން ދިނުމުގައި ޚިޔާލު ތަފާތުވުން އުފެދި މަޖިލިހުގައި މެމްބަރުންގެ މެދުގައި މިއަދު ބޮޑެތި ހަމަނުޖެހުންތަކެއް ހިނގާ ބައެެއް މެމްބަރުންނަށް ވަނީ އަނިޔާވެސް ވެފައެވެ.
މިއަދު ބާއްވާ ރައްޔިތުންގެ މަޖިލިހުގެ ޖަލްސާގައި، ފޮރިން މިނިސްޓަރު މޫސާ ޒަމީރާއި ބަންޑާރަ ނައިބު އަހުމަދު އުޝާމް އާއި ހައުސިން މިނިސްޓަރު ޑރ. އަލީ ހައިދަރު އަދި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށް ރުހުން ނުދޭން ދަ ޑިމޮކްރެޓްސް އިން ވަނީ ނިންމާފައެވެ.
ބަންޑާރަ ނައިބު އަހުމަދު އުޝާމް އާ އެކުގައި މި ސަރުކާރުގެ ތިން ވަޒީރަކަށް ރުހުން ނުދިނުމަށް އެމްޑީޕީގެ ޕާލަމެންޓްރީ ގްރޫޕުން ތްރީ ލައިން ވިޕެއް ނެރެފިއެވެ.
އަދި އެމްޑީޕީ ޕާލަމެންޓްރީ ގްރޫޕްގެ މިއަދުގެ ބައްދަލުވުމުގައި ނިންމާފައި ވަނީ އުޝާމްގެ އިތުރުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނސްޓަރު ޑރ. އަލީ ހައިދަރާއި އިކޮނޮމިކް މިނިސްޓަރު މުހައްމަދު ސައީދުއަށް ރުހުން ނުދިނުމަށެވެ.
އެހެންނަމަވެސް ސަރުކާރަށް ނިސްބަތްވާ މެމްބަރުންގެ އިހިތިޖާޖުތަކުގެ ސަބަބުން މަޖިލިސް ޖަލްސާވަނީ ކުރިޔަށް ނުގެންދެވިފައެވެ.
އޭގެ އިތުރުން އިދިކޮޅު ޕާޓީތަކުން ބައެއް ވަޒީރުންނަށް ރުހުން ނުދޭން ނިންމުމާއެކު، މަޖިލިސް ދޮށަށް ވަނީ ސަރުކާރަށް ތާއީދުކުރާ ބައެއް ފަރާތްތަކުން އެއްވެ ސަރުކާރު ހިންގުމަށް ދަތި ނުކުރުމަށް ގޮވާލާ މުޒާހިރާވެސް ކޮށްފައެވެ.
މަޖިލިސް ތެރޭގައި ހިނގަމުންދާ ހަމަނުޖެހުންތަކައި ގުޅިގެން މިއްދުގެ ޖަލްސާ އަދިވެސް ވަނީ ކުރިޔަށް ނުގެންދެވިފައެވެ.
