މިހާރުވެސް ރައްޔިތުންގެ މެޖޯރިޓީ އެބައޮތް ކަމަށާއި، އާ ދައުރު ފެށޭއިރުވެސް ރައްޔިތުންގެ މަޖިލިހުގެ މެޖޯރިޓީ އޮންނާނޭ ކަމުގައި އެމްޑީޕީން ބުނެފިއެވެ.
އެމްޑީޕީގެ ޕާލަމެންޓްރީ ގުރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައްޔިތުންގެ މަޖިލިހުގެ ހުޅުމާލެ ދާއިރާގެ މެންބަރު އަލީ ނިޔާޒު ވިދާޅުވީ ޕާޓީގެ ޓިކެޓްގައި އިންތިޚާބުވުމަށްފަހު ޕާޓީ ބަދަލު ކުރުމަކީ ވޯޓްދިން ރައްޔިތުންނަށްދޭ ވަރަށް ބޮޑު ދެރައެއް ކަމަށެވެ. ނިޔާޒު ވިދާޅުވީ އެހެންނަމަވެސް، 43 މެންބަރުންނާއެކު އަދިވެސް މަޖިލީހުގެ މެޖޯރިޓީ އެމްޑީޕީއަށް އެބައޮތް ކަމުގައެވެ.
މި މެޖޯރިޓީ އިރާދަކުރެއްވިއްޔާ ކުރިއަށް އޮތްތަނުގައި އަޅުގަނޑުމެން ހިފަހައްޓާނަން. އިތުރު މެންބަރަކު ވަކިވެގެންދާ ތަނެއް އަޅުގަނޑުމެންނަކަށް ނުފެނޭ.
ނިޔާޒު ވިދާޅުވިއެވެ.
ޕީއެންސީއަށް އެމްޑީޕީގެ 13 މެމްބަރަކު ސޮއިކުރުމަށް ބޭއްވި ޖަލްސާގައި ވާހަކަ ދައްކަވަމުން އިނގިލި ބުރިކޮށްލިއަސް އެމަނިކުފާނާ ދެކޮޅަށް ވޯޓު ނުދޭނެ މެންބަރުން އެމްޑީޕީގައި އެބަތިބިކަމަށް ޕީއެންސީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވި ވިދާޅުވަމަށް ރައްދު ދެމުން އަލީ ނިޔާޒު ވިދާޅުވީ ރައީސް ބޭނުންފުޅުވާ ގޮތަށް ވޯޓް ދެއްވާނެ އިތުރު މެންބަރަކު މިހާރު އެމްޑީޕީގައި ނެތް ކަމަށެވެ.
އަޅުގަނޑު ގަބޫލުކުރާގޮތުގައި އެ ބޭފުޅުން އަޅުގަނޑުމެންގެ ތެރެއިން އިތުރަށް މެންބަރުން ހޯއްދެއްވުމަކަށް މަސައްކަތްތަކެއް ނުކުރައްވާނެ. ވިދާޅުވެފައި އެބައޮތް ވަޒީރުންނަށް ރުހުން ހޯދަން ވެސް ދެން މަސައްކަތެއް ނުކުރާނަމޭ. އެއީކީ ބޭނުންހުރި ކަމެއް ނޫނޭ. ސަރުކާރު ހިންގުމަކަށް ވެސް އުނދަގުލެއް ނޫނޭ. އެހެންވީމަ އަޅުގަނޑަށް ގަބޫލެއް ނުކުރެވޭ އެކަން ކުރައްވާނެ ކަމަކަށްވެސް.
މިއަދުގެ ޕްރެސް ކޮންފަރެންސްގައި ވާހަކަ ދައްކަވަމުން އަލީ ނިޔާޒު ވިދާޅުވިއެވެ.
މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައްޔިތުންގެ މަޖިލިހުގެ ހޯރަފުށި ދައިރާގެ މެމްބަރު އަދި މަޖިލީހުގެ ނައިބު ރައީސް އަޙްމަދު ސަލީމް ވިދާޅުވީ އެމްޑީޕީގެ ޕީޖީ އޮތީ ވަރަށް ބަދަހިކޮށް ކަމަށެވެ. އަދި މަޖިލީހުގެ މި ދައުރު ނިމޭއިރު ވެސް އެ ޕާޓީ އޮންނަނީ މެޖޯރިޓީއާއެކު ކަމަށާއި ރައީސް އަޒުލުކުރަން އެމްޑީޕީން އުޅޭ ކަމަށް ދެކެވޭ ވާހަކައަކީ ދޮގެއް ކަމުގައެވެ.
