އިއްޔެ ބޭއްވުނު ޑިމޮކްރެޓްސް ޕާޓީގެ އެތެރޭގެ އިންތިޚާބުގެ ނަތީޖާއާމެދު ހިންހަމަ ނުޖެހޭ ކަމަށާއި އެހެންނަމަވެސް އެއްވެސް ޝަކުވާއެއް ކުރަން ބޭނުން ނުވާކަމުގައި، އެ ޕާޓީގެ ރައީސްކަމަށް ވާދަކޮށް އިންތިޚާބުން ބަލިވި ހުސެއިން އަމްރު ވިދާޅުވެއްޖެއެވެ.
ގިނަ ބައެއްގެ ފާޑުކިއުން އަމާޒު ވެފައިވަނިކޮށް، އެންމެ ތިންހާހެއްހާ މީހުން ވޯޓުލީކަމަށް ދައްކާ އިންތިޚާބުގެ ނަތީޖާ، ވޯޓު ލީތާ 24 ގަޑިއިރުފަހުން އިއުލާން ކުރެވިގެން ދިޔައިރު، ވަގުތީ ނަތީޖާއިން ކުރި ހޯދާފައިވަނީ އެ ޕާޓީގެ ވަގުތީ ޗެއަރޕާސަންކަމުގެ މަގާމުގައިވެސް ހުންނެވި ހަސަން ލަތީފްއެވެ.
ރޭގެ އިންތިޚާބުގެ ވަގުތީ ނަތީޖާ އިއުލާން ކުރުމަށްފަހު އަމުރު ކުރި އެކްސް ޕޯސްޓެއްގައި އޭނާ ވިދާޅުވެފައިވަނީ ކޮންމެ އިންތިޚާބަކުން މޮޅުވާ ފަރާތަކާ ބަލިވާ ފަރާތެއްވެސް ވާނެ ކަމަށާއި، އިންތިޚާބުތަކާ އޭނާ ކުރިމަތިލަނީ އެކަން އެނގިހުރެ ކަމުގައެވެ.
އެގޮތުން ބައެއް އިންތިޚާބުތައް ކާމިޔާބު ކުރެވިފައިވި ނަމަވެސް، ބަލިވެފައިވާ އިންތިޚާބުތަކުގައި އެކަމާ ޝަކުވާ ކޮށްފައި ނުވާނެކަމަށްވެސް އަމުރު ވިދާޅުވެފައި ވެއެވެ. އޭނާ އިތުރަށް ވިދާޅުވެފައިވަނީ އެމްޑީޕީގެ ޗެއަރޕާސަން އިންތިޚާބުގައިވެސް ވާދަނުކޮށް ފަހަތަށް ޖެހުމާއި އަދި ޑިމޮކްރެޓްސްގެ ރިޔާސީ ކެނޑިޑޭޓްކަަމަށްވެސް އޭނާ ކުރިމަތިނުލާ ފަހަތަށް ޖެހުނީ ދޫދިނުމުގެ ބޭނުމުގައި ކަމުގައެވެ.
އެހެންނަމަވެސް ގޯސްކަމެއް ފާހަގަވުމުން އެކަން އޭނާ ފާހަގަކުރާކަމަށް ވިދާޅުވަމުން އަމްރު ވިދާޅުވީ، ނިމިދިޔަ، އެ ޕާޓީގެ ރައީސަކު ހޮވަން ބޭއްވި އިންތިޚާބާމެދު އޭނާ ހިންހަމަ ނުޖެހޭ ކަމުގައެވެ. އެހެންނަމަވެސް ހިންހަމަ ނުޖެހެން މެދުވެރިވީ ސަބަބެއް އޭނާ ފާހަގަ ކުރައްވަފައެއް ނުވެއެވެ.
ޑިމޮކްރެޓްސް ޕާޓީގެ ބައެއް މެމްބަރުންވަނީ ނިމިދިޔަ އެޕާޓީގެ އެތެރޭގެ އިންތިޚާބު އޮޅުވާލަފައިވާކަމަށް ތުހުމަތު ކޮށްފައެވެ.
ޑިމޮކްރެޓްސް ޕާޓީން އިއުލާންކުރި ވަގުތީ ނަތީޖާ ދައްކާ ގޮތުން ހަސަން ލަތީފު އިންތިހާބު ކާމިޔާބުކުރެއްވީ 1,704 ވޯޓުންނެވެ. އޭނާއާ ވާދަކުރެއްވި، ނިމިދިޔަ ސަރުކާރުގައި އެސްޓީއޯގެ މެނޭޖިން ޑިރެކްޓަރުކަން ކުރެއްވި ހުސެއިން އަމްރުއަށް ލިބުނީ 1,300 ވޯޓެވެ. ޕާޓީގެ ރައީސް އިންތިޚާބު ކުރުމަށް ބޭއްވުނު ވޯޓުގައި 50 ވޯޓު ބާތިލް ވެފައި ވެއެވެ.
ޑިމޮކްރެޓްސްގެ އެތެރޭގެ އިންތިޚާބުގައި ވޯޓުލުމުގެ ޙައްޤު 5883 ފަރާތަކަށް ލިބޭކަމަށް އެޕާޓީން ބުނެފައިވެއެވެ. ޑިމޮކްރެޓްސްއިން މަޢުލޫމާތު ދިންގޮތުގައި އެޕާޓީގައި ޖުމްލަ 1043 މަޤާމަށް މީހުން ހޮވާއިރު މީގެ ތެރެއިން 271 މަޤާމަކަށް މީހުންވަނީ އިންތިޚާބުވެފައެވެ.
ޑިމޮކްރެޓްސްގެ ރައީސްކަމަށް ހަސަން ލަތީފު އިންތިޚާބުގެ ވެގެންދިޔައިރު، މި އިންތިޚާބުގައި ކުރީގެ ރައީސް މުހައްމަދު ނަޝީދުގެ ތާއީދު އޮތީ ހަސަން ލަތީފަށް ކަމަށް ވަނީ ބެލެވިފައެވެ.
ކޮމެންޓު ފޮނުވާ