ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލާގައި ވޯޓަށް ނުފިއްލަވައި އެމައްސަލާގައި ވޯޓު ނަގަން ފުރުސަތު ދެއްވުމަށް ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަދި ރައީސް އިބްރާހިމް މުހައްމަދު ޞާލިހުގެ ކޮއްކޯފުޅު ޢަލީ ނިޔާޒު ވިދާޅުވެއްޖެއެވެ.
އޭނާ މިހެން ވިދާޅުވީ ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ ދެވަނަ ފަހަރަށް މަޖިލީހަށް ވެއްދުމަށް ޓަކައި އެމްޑީޕީގެ މަޖިލިސް މެންބަރުންގެ ސޮއި ހަަމަކުރީ، އޮޅުވައިލައި، ބިރުދައްކައިގެން ކަމަށް މަޖިލީހުގެ މައިނޯރިޓީއަށް ނިސްބަތްވާ ހުޅުދޫ ދާއިރާގެ މެންބަރު އިލްޔާސް ލަބީބު ކުރެއްވި ތުހުމަތުތަކަށް ރައްދު ދެއްވައި ކުރި ޓުވީޓުގައެވެ.
އަލީ ނިޔާޒު ވިދާޅުވީ އިލްޔާސް ހައްދަވަނީ ކަނޑައެޅިގެން ބޮޑު ދޮގެއް ކަމަށެވެ. ރައީސް ނަޝީދު މަޖިލީހުގެ ރައީސް ކަމުގެ މަޤާމުން ވަކި ކުރުމަށް މަޖިލީހުގެ ގިނަ އަދަދެއްގެ މެމްބަރުން ބޭނުންވާ ކަމަށާއި، ނަޝީދު ވަކި ކުރުމަށް މެމްބަރުންނަށް ފުރުސަތު ދެއްވުމަކީ ކުރަންޖެހޭ ކަމެއްކަމަށް އޭނާ ވިދާޅުވިއެވެ.
ކަނޑައެޅިގެން ދޮގެއް. ސޮއިކުރި 49 މެމްބަރުންގެ އިތުރަށް ސޮއިކުރަންވެސް، ވޯޓްދޭން ވެސް ގިނަ މެމްބަރުން އެބަތިބި. ވޯޓަށް ނުފިލާ މެމްބަރުންނަށް ގޮތް ނިންމުނަށް ފުރުސަތު ދެއްވާ. ނަތީޖާ އެނގޭނީ އެއިރުން.
– އަލީ ނިޔާޒު ވިދާޅުވިއެވެ.
އެމްޑީޕީގެ ޕީޖީން އަލުން ރައީސް ނަޝީދުގެ އިތުބާރުގެ މައްސަލަ މަޖިލީހަށް ވައްދަން ނިންމީ ރިޔާސީ އިންތިޚާބުގެ ދެވަނަ ބުރުން ލިބުނު ބޮޑު ނާކާމިޔާބީއާ އެކުގައެވެ. ފުރަތަމަ ބުރުގެ ކުރިން އެ މައްސަލަ ހުށަހަޅައިފައި އޮތް އިރު، އެ މައްސަލަ އަނބުރާ ގެންދިޔައީ ދެވަަނަ ބުރަކަށް އިންތިޚާބު ދިޔުމުންނެވެ.
ރައީސް ނަޝީދުގެ އިތުބާރުގެ މައްސަލައިގައި އެމްޑީޕީގެ ޕީީޖީގައި ހިމެނޭ މެންބަރުންގެ ސޮއި ގިނަ ނަމަވެސް، އެ މައްސަލައިގައި ސީދާ، ފާޅުކަން ބޮޑުކޮށް އަޑު އުފުލައްވަނީ މަދު މެންބަރެކެވެ.
One Response
ގިނަ ރައްޔިތުންވެސް ބޭނުންވަނީ އޭނާ ސިޔާސީ ދާއިރާއިންވެސް ބޭރުކުރަން.