އޭރުވެސް މިހާރުވެސް ނަޝީދަށް އެމްޑީޕީގެ މަޖިލިސް މެމްބަރުންގެ އިތުބާރު ނެތްކަމަށް ރައީސް ސާލިހު ވިދާޅުވެއްޖެއެވެ.
އެމްޑީޕީގެ ކުރީގެ ރައީސް، އަދި މިހާރުގެ މަޖިލިސް ރައީސް ރައްޔިތުންގެ މަޖިލިހުގެ ރިޔާސަތުން ދުރުކުރުމަށް އެމްޑީޕީގެ ޕީޖީން ކުރަމުންދާ މަސައްކަތްތަކާ ގުޅޭގޮތުން މީޑިއާއަށް މައުލޫމާތު ދެއްވަމުން ރައީސް ސާލިހު ވިދާލުވީ ނަޝީދުގެ އިތުބާރު ނެތްކަމުގެ މައްސަލަ އަލުން މަޖިލިހަށް ވައްދާފައިވަނީ އެމްޑީޕީގެ ޕާލަމެންޓްރީ ގުރޫޕުގެ އިތުބާރު ނަޝީދުގެ މައްޗަށް ނެތިގެން ކަމުގައެވެ.
ރައީސް ސާލިހު ވިދާޅުވީ "އެހެންވީމާ އެ ގޮތަށް އެމްޑީޕީން ކުރިއަށްދާނެކަމަށް އަޅުގަނޑު ގަބޫލުކުރަނީ" ކަމުގައެވެ.
އެހެންނަމަވެސް އެއްފަހަރު އިތުބާރުގެ މައްސަލަ ވައްދާފަ، އެމައްސަލަ އަބުރާ ގެންގޮސްފަ އަނެއްކާވެސް އިތުބާރު ނެތްކަމުގެ މައްސަލަ އަބުރާ ވެއްދުމާއި ގުޅޭގޮތުން ސުވާކުރުމުން ރައީސް ސާލިހު ވިދާޅުވީ އޭރުވެސް އެމްޑީޕީގެ ޕީޖީގެ އިތުބާރެއް ނަޝީދަށް ނެތްކަމުގައެވެ. އެހެންނަމަވެސް އޭރު މައްސަލަ އަބުރާ ނެގީ ވަގުތީ ގޮތުން ކަމަށާއި، އެނިންމުން އޭރު ނިންމަން ޖެހުނީ ރިޔާސީ އިންތިޚާބުގެ ތެރޭގައި އިތުރު ހަލަބޮލި ކަމަކަށް ދާން ބޭނުން ނުވާތީ ކަމުގައެވެ.
އެ ވަގުތު ބޭނުންނުވާތީ ވަގުތީ ގޮތުން ކުރިކަމެއް. އެއިރަކު ވެސް އިތުބާރު އޮވެގެންނެއް ނޫން. ކަންތައްތައް ކުރަމުންދިޔަ ގޮތް އެއްގޮތަކަށް ވެސް މަޖިލިސް މެމްބަރުންނަކަށް ކަމަކުނުދޭ. އެހެންވީމާ އެ ކަން ކުރިއަށްގެންދާ ގޮތަށް އެއިރު ވެސް އޮތީ.
ރައީސް ސާލިހު ވިދާޅުވިއެވެ.
އެމްޑީޕީގެ ޕާލަމެންތްރީ ގުރޫޕުން މިއަދު ބުނެފައިވަނީ، ރައްޔިތުންގެ މަޖިލިހަށް މިހާރު ހުށަހެޅިފައިވާ، މަޖިލިސް ރައީސްގެ އިތުބާރު ނެތްކަމުގެ މައްސަލައާއި ގުޅޭގޮތުން ގޮތެއް ނުނިންމާ، ނަޝިދު ރިތާސަތުގައި އިންނަވައިގެން އިންތިޚާބީ ރައީސް މަގާމުގެ ހުވާކުރައްވައިފިނަމަ އެ ހުވައަކީ ސައްޙަ ހުވައަކަށް ވެގެން ނުދާނެ ކަމަށާއި، އަދި އެފަދަ ހާލަތެއްގައި ޑރ. މުއިއްޒު ހުށަހަޅުއްވާ ކެބިނެޓަށް މަޖިލިހުގެ ރުހުން ނުލިބޭނެ ކަމުގައެވެ.
އެމްޑީޕީގެ ޕާލަމެންޓްރީ ގުރޫޕުން ތްރީލައިން ވިޕެއްނެރެ، ދެވަނަ ފަހަރަށް ރައްޔިތުންގެ މަޖިލިހަށް ހުށަހަޅާފައިވާ ނަޝީދުގެ އިތުބާރު ނެތްކަމުގެ މައްސަލަ އަންނަ އާދީއްތަ ދުވަހަށް އެޖެންޑާ ކުރެވޭނެކަމަށް މަޖިލިސް އިދާރާއިން މިހާރުވަނީ އަންގާފައެވެ. އެހެންނަމަވެސް އެދުވަހަށް އެ މައްސަލަ އެޖެންޑާ ކުރާނެކަމެއް އަދި ޔަގީން ކުރެވިފައެއް ނުވެއެވެ.
ކޮމެންޓު ފޮނުވާ